中環在線：莎莎純利大跌 影響心情
郭少明講馬開心番
內地旅客減少，主力sell內地客賣化妝品嘅莎莎（178）首當其衝，上半年度比舊年同期少賺一半有多，難怪主席郭少明主持業績會後都承認心情麻麻，不過身為大馬主嘅郭生，一提到馬仔表現唔錯，笑容即刻返曬嚟，郭太（郭羅桂珍）都話最近忙住陪
郭生睇賽馬，冇時間去買衫㖭呀！
郭少明與郭太係「美麗系」馬主，兩人都係愛馬之人，養過超過20隻馬匹，經常出入馬場。郭少明一講起馬仔都生猛好多，佢話，經營莎莎係當生意咁做，養馬就係為興趣。雖然業績唔多好，只要贏到場馬，就可以平衡一下心情。
郭太在旁聽見，忍唔住都要講埋一份，話咁多隻馬有時都好難應付，不過郭生鍾意賽馬，佢實要陪佢睇，有時掛住陪佢，連衫都唔得閒睇咁話。
■郭羅桂珍打扮靚靚同老公出席莎莎業績會。 李潤芳攝 太太：得閒就做facial
雖然話唔得閒睇衫，但係郭太噚日都打扮得靚靚出現，著上D&G青花瓷印花套裝，配上一對Chanel露趾鞋，都幾搶鏡。郭太仲話，除咗睇馬，一得閒就做番個facial護膚，咁又係，唔係點做生意呢？
講起護膚化妝品，郭少明都話要食住潮流趨勢，入多啲平價韓國化妝品。雖然日本、韓國紙水低咗咁多，好多人選擇到當地旅遊消費，但郭少明始終認為港人對日、韓化妝品嘅需求唔少，嚟緊都會keep住入貨。佢聖誕節亦會留喺香港，幫手推動本地消費！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
