走勢大預言
2015年11月25日
港股議息前繼續悶局，有趣的反而係最近部份外資對內地股市有少少轉變跡象。美國CNBC報道，話最近內地股市冉冉上升，若然上證綜指能夠升破3800點，咁技術走勢就證實今季會有強力反彈咁話。
CNBC財經節目《交易日》話對內地股市有人睇好有人睇淡，先講淡友，佢引述Stifel Ni
colaus" Washington Crossing Advisors的基金經理Chad Morganlander話，現在有幾個理由令佢覺得買內地股票有危險，包括內地經濟轉弱、高負債同估值趨升。呢個風險甚至係明年會影響埋美股。
上證破3800確認勁彈
不過，CNBC又引述技術走勢分析專家Piper Jaffray的Craig Johnson話，如果上證指數能夠衝破3800點(昨收3616點)，咁短期就會有幾靚仔走勢，而且對全球股市嚟講都係咁睇。基金經理從宏觀條件對A股睇淡，技術派高手就短期等緊突破，兩者方向咁唔同。
上證綜指近日在3600點上下橫行，市場相信係等緊國際貨幣經濟組織(IMF)月底公佈是否決定將人民幣納入提別提款權(SDR)籃子。內地南方基金首席策略分析師楊德龍就話，人民幣入籃成功，將大大提升投資者對人仔資產信心，促使A股出現新一輪上漲，當中特別有利金融、房地產、一帶一路等行業同板塊，呢個可能亦係上證蠢蠢欲動上試高位的誘因，至於會否升穿3800點，就真係世紀大預言啦。
當然，入籃消息炒咗咁耐，有人會擔心利好消息證實會帶來反高潮。喺等緊消息之際，上證綜指昨日先跌後彈，收市微升5.79點，報收3616點。恒生指數收市就造22587點，跌78點；國企指數收10156點，跌72點，成交好奀，跌到只有572億元。土耳其打落俄羅斯戰機，搞到歐洲股市插插，唔知會唔會郁到美元同金價。
市場靜靜哋，中環茶友有興趣係八卦話題。馬雲斟購《南華早報》的消息，令報業股開市就升。雖然升得唔多，但反映市場憧憬交易成真。同一時間，外界又傳有內資想買台灣東森電視，媒體忽然間好似成為內地資金的甜心。
恒大豪掃商廈有數圍
講起內資湧港，市場近日最熱議的一單交易，當然係華置以125億元出售灣仔萬利大廈的交易。華置賣到咁好價錢，連地產大龍頭都畀隻拇指佢，點解恒大願意高價接貨呢？有人拆局，話同交易條件有關。有接近交易人士解話，今次三個財團出價，恒大畀價最勇，關鍵係付款條件有着數。根據安排，恒大喺六年分期付款，恒大首付只係一成，成交後再俾三成，就可以買到成幢大廈，之後分六年俾，可以攞去銀行做按揭借錢，假如物業升值，將來仲可以加按，所以槓桿率好高，符合刀仔鋸大樹的玩法。
今次交易作價咁高，若然以收租角度，計入融資成本，肯定係負回報率，但內資買嘢唔係咁睇，他們最着重係升值。從他們眼中，有六年時間睇，畀貴小小絕對值得，尤其係家大量資金湧出中國，可以早着先鞭，點解唔博一博？再者，國企湧港之後，民企能夠擁有一座港島向海大廈的業權，恒大仲係第一個。以佢一年賣樓千幾兩千億，買座大廈威威有何不可？任何大交易買賣雙方要求得到的東西都會唔同。華置老闆喺香港有不少靚物業，有人肯出高價，點解唔賣？從恒大角度，內地放水，好快又成街資金，可以走出中國買座靚樓，畀貴少少根本無所謂，聽講如果華置肯再拖長個交易期，買方話再畀貴少少都得。從呢個交易去睇，本地貴重資產，仲係有吸引力。
陸羽仁
金融High Tea 舊文
