魚樂無窮：強勢板塊滄海遺珠
■大落後嘅李寧有望來一個華麗轉身。 資料圖片
個市悶得發瘋，全日成交600億元唔夠，重回2月時水平。回想大時代，朝早未夠11點，成交肯定唔止600億元，只能嘆句「有咁耐風流，有咁耐折墮」！究竟有幾悶？不妨望望升幅榜，50大股份中，只有恒大健康（708）及
中海物業（2669）成交額破億元，兩者市值分別204億元及54億元，意味細價股縱有升幅，成交卻不配合，炒味濃極有限，難怪唔少戰友都無心戀戰，準備收爐。
奇就奇在，股價與成交掛鈎嘅港交所（388），表現硬淨到暈，較大時代前仍有兩成升幅，究竟係市場調節機制出現問題，抑或有春江鴨等食大茶飯，只能由時間畀答案大家。
體育用品股算是少有長炒長有板塊，之前推介過嘅安踏（2020）及特步（1368）亦順利破頂，大落後嘅李寧（2331），有望來一個華麗轉身。安踏及特步今年分別累升79%及61%，李寧卻只得12%，完全輸在起跑線，但炒作概念絕不遜於兩者。李寧2016年第二季訂貨會，訂單增長處於10%至20%高段，較首季的中段更勁；中期虧損僅2,941萬元，較去年全年蝕7.8億元大幅收窄，所有數據均顯示復蘇來了，但股價卻仍在九年低位，較2010年高位勁跌近九成，於理不合，只要資金轉炒落後，李寧即可上演醜股大翻身，去番100億元市值（現時80億元）先算合理。
唐牛
https://www.facebook.com/tongcow88
唐牛
魚樂無窮 - 唐牛 舊文
