財經評論 2015年11月26日
財經評論：經紀搵食艱難
■地產經紀企街企地盤身水身汗，不易撈客。 資料圖片
二手樓市沉寂，一手盤熱賣搶客，對經紀而言，一手傭金也高（一般為成交價2.5%至3.5%），落力去做。但隨著市場資訊透明度越高，一手買家要求代理「回贈」傭金越普遍，為此雙方糾紛時有所聞，上月底更有客人到分行爆粗爭取「回贈」八成傭金。
僧多粥少冇肉食
行內競爭大，經紀為求開單都應承回贈部份傭金。與經紀甲說起此事，他坦言通常回三至五成，若然客人大貪要回八九成，根本無肉食。「你就食肉，連碗湯都唔畀我飲，淨係畀嚿骨頭我哽。」經紀甲大呻市道差，搵食艱難，不排除有尖子爆數，但食白果的經紀仍是最多，靠三幾個月開一張單吊命，企街企地盤身水身汗，企港鐵同商場稍有推銷行動就會被保安及職員趕，不易搵客。
根據地產代理監管局資料顯示，10月份地產代理個人牌照有37,272名，而土地註冊處公佈同月所有買賣合約數目4,491宗，簡單計平均8.3人爭1單刁，絕對僧多粥少。
樓價高企，客人攞回贈當補貼可理解，亦有覺得代理代入票很簡單，攞著數是應份。然而，代理不是沒付出，包括印製大量單張介紹，預先凍結巨額資金打定本票供客人備用，尤其星期六、日銀行關門，是入票高峯期最常見，客人透過碌卡過數歸還，據悉，有客人趁機賺信用卡積分，自己專登不出本票。
銀行做每張本票費用約50元，信用卡中心在每項交易收取手續費，這些不會轉嫁客人身上，成為代理開支的一部份。倘買家最終無買樓，待發展商退票，代理後勤人員核實文件及客人程序，再經信用卡退款，耗盡人力、物力及時間，尚有舖租人工及雜項等等。經紀甲更稱有些客人很巴閉，指明要實地視察樓盤，態度似大爺，一齊坐的士去，惟落車無意付車資，自己坐車頭，惟有硬食畀錢，冇得claim公司。
說句公道話，回贈是雙方協議，成數多少慢慢傾，正如工匠裝門，「過得自己，過得人」。
記者︰溫潤潔
財經評論 舊文
