中環在線：莊氏27歲少爺仔上位
莊家淦升任勤達董事總經理
■莊家淦（中）曾被雜誌刊登與四女伴在遊艇曬太陽嘅相片。 《壹週刊》圖片
提起本地富商莊紹綏，大家未必清楚知道佢旗下有3間上市公司，最有印象只係佢長子莊家彬與藝人傅明憲嘅戀情。唔講唔知，佢四位子女原來入曬3間上市公司幫手，27
歲細仔莊家淦新近亦升做勤達（1172）董事總經理，聞說呢位公子好鍾意騷肌肉㗎喎。
每年酬金124萬
莊紹綏持有莊士機構（367）、莊士中國（298）同埋勤達3隻股，兩間莊士主要做中港地產生意，市值分別15億與7億元，莊家彬與細佬莊家豐一齊喺兩間莊士身居要職。
比較少喺娛樂版或雜誌見到嘅莊家淦，喺2011年已經加入勤達，即日起由副董事總經理升正做董事總經理。根據公司通告，莊家淦持有文學士學位，主修經濟，不過就冇寫明佢喺邊間大學畢業，另外又話佢喺財務同企業管治方面有成6年經驗。升職後，莊家淦負責公司整體業務嘅日常營運，每年酬金124萬元。
呢間勤達都幾特別，市值8億元，主要做印刷歐美書籍，包括藝術書、畫冊等等，亦管理廣東省四會市一個墓園。究竟莊紹綏想細仔，點樣發展呢間公司嘅業務呢？
暫時唔知莊家淦識唔識得做生意，但係佢應該好鍾意健身同騷肌肉，事關2012年時，有雜誌登咗佢同4位靚女瞓喺遊艇上面曬太陽嘅相片，不過自此之後，就冇乜特別爆嘅娛樂新聞流出。又咁講，今時今日，富二三代都係城中筍盤，有型冇型都輕易吸引異性，莊家淦有個靚body，肯定搶手。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
