一周三件：精電乘勢回升
■精電主打汽車顯示屏，今年上半年盈利增長22%。 資料圖片
精電（710）今年下半年，食住祖國汽車銷量回暖，加埋歐洲區汽車銷量，keep到增幅，主打顯示屏應該掂檔，唔計過億元非經營收益，全年預測PE，都係得5倍幾單位數。
歐洲銷情好轉
精電主打汽車顯示屏，另
有涉及家電同醫療用品顯示屏。今個上半年，精電就算唔計總值達到1.5億元嘅出售聯營Data Modul AG、同證券未變現等非經營收益，盈利仍然增長22%，到1.2億元，上半年已經過關。又上半年，祖國同歐洲平分秋色，精電喺兩個地區嘅營業額，分別去到4.3億元同近5億元，佔咗總收入72%。祖國汽車業界，上半年嗌曬救命，但踏入下半年，除7月份，8月到11月廣義乘用車銷量，回復同比增幅，當中10月同11月，升幅更上到11.3%同17.6%。
歐洲又點？根據歐洲汽車製造商協會數據，今年頭10個月，歐盟新車銷量同比增加8.3%，精電主打法國、意大利同德國等地區，喺10月份增幅1%到8.6%不等。睇到係，精電呢兩個主要搵銀地，一個銷情好轉，一個維持到增幅，照計，精電下半年仲掂！
就咁估精電今年核心盈利，只係keep住上半年22%增長，到3億元，預測PE得5.5倍。又連埋上邊過億元嘅非經營收益計，精電更加得番3.8倍PE。精電過去5年平均7.8倍PE，拉長啲到10年，平均PE講緊11倍樓上，就算比起5年平均，精電預測PE都平咗一大截。
均真啲以今年5.5倍預測PE做準，精電上番7.8倍水位，現價5.04元講緊要升42%，到7.1元。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com
