中環在線：倪匡現身交易所
為網遊商上市撐場
■左起：項明生、葉念琛同倪匡三位男士傾乜咁開心呢？ 李潤芳攝
港交所（388）展覽廳噚日早上出現一位稀客，就係有香港四大才子之稱嘅名作家倪匡，事關《勁舞團Online》、《SD高達Online》等網上電腦遊戲開發商智傲控股（8282）掛牌
，老闆施仁毅原來與倪匡相當熟落，倪匡於是現身支持，不過佢就冇幫手敲鑼。
施仁毅係本港有名嘅遊戲製作人，原來佢太太陳麗珠係倪匡契女，唔怪得晨早畀面出席上市儀式，佢9點鐘鬆啲就出現，等老闆敲完鑼、影多陣相先至走。
項明生 葉念琛 到賀
同場仲有46歲「旅遊達人」項明生，佢2013年加入智傲做行政總裁，舊年底辭任，轉做非執董。佢話，幾年前已經打算退休環遊世界，「兄弟（施仁毅）叫到，我就即管幫嚇手」，如今智傲成功上市，項明生都好開心，仲話：「自己嘅任務完成咗！」
咁項明生係咪真．退休？咁又唔係喎。佢透露，最近簽咗華誼兄弟，做旅遊節目，仲做埋香港區總監，實行寓工作於娛樂。
除咗倪匡、項明生，導演葉念琛都有到賀，唔知日後佢嘅愛情小品，係咪可以成為智傲旗下嘅其中一個網上電腦遊戲呢？同場仲有施仁毅好友、本港著名漫畫家馬榮成賀上市。
查實，智傲早年靠自製電腦網上遊戲《古龍群俠傳》，已經喺網吧同遊戲界打響名堂，其後開始代理《勁舞團online》及《SD高達Online》等遊戲。近兩年公司開始轉型，集中火力代理手機遊戲，其中《Sega創造球會》及《天龍八部3D》都大受歡迎。
■光大證券高層帶咗幾本書畀倪匡（左）簽名。 
■馬榮成（左）都捧老友施仁毅場。 李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
