博賣盤考耐性
2016年01月14日
經過周二大幅夾高離岸拆息，本港離岸人民幣拆息昨日大幅回落，有人形容前日夾息猶如投放核彈，一炸之下地面上所有嫌疑敵堡都炸平，至於有無狙擊手仲躲在地底就唔知啦。核彈過後，香港銀行人仔隔夜拆息回番到8厘，人仔匯價相對平靜，港股借勢反彈，但衝上兩萬點後仲
係有阻力，顯示市場人心仲未回穩。
人仔停戰 港股即彈
香港人仔拆息爆上，海外市場爆炸力仲厲害。經過一輪猛爆，據財資市場公會公佈，隔夜離岸人民幣拆息昨日定價為8.31厘，比上日66.815厘，大幅下跌58.505厘。至於人民幣兌美元即期昨日走勢平穩，平收6.575兌1美元，中間價繼續維穩引導市場預期，兌美元微跌2點子，報6.563兌1美元。
市傳內地官方限制中資銀行拆出資金，大舉夾息擊退造淡人民幣的炒家。從表面情況保守啲睇，只能話資金緊張程度紓緩，沽空投機者稍為收斂，但無人肯定係咪戰略性撤退。阿爺同投機者一輪埋身肉搏，勝負仍然未分，內地專家對如何理順匯價仲係意見紛陳，有人主張順勢而行，有人認為要主動引領，而非一味迎合市場預期。
從阿爺角度，喺離岸市場挾息，就算唔可以治本都可以治標，換取時間處理問題，隨着人仔匯價有秩序回調，炒家可操作空間就會慢慢減少。對炒家來說，阿爺雖然托匯夾息，但唔能夠扭轉匯價向下的預期，家平倉離場，唔等如唔可以再沽過，反正避一避風頭，唔同北京硬撼，反而可以減低被人一鋪打殘的風險。按呢個情況去睇，人仔匯價向下風險唔可以話完全消除，隨時有第二輪震盪。不過，至少阿爺有「架生」在手，唔至於任人砌咁牙煙。
人仔戰線暫停硝煙，加上美股連升兩日，恒生指數高開後，一度升523點，高見20234點，但內地股市掉頭急插，以全日低位收市，大跌2.4%收場(可能阿爺見市場定咗唔再托)，累及港股尾市升幅削半，全日只升逾兩百點，未能企穩兩萬點大關收市。恒生指數收報19934點，反彈223點；國企指數收報8494點，漲55點，成交金額774億元。
在升市中，大新系正探討保險業務策略方案，消息透露，大新金融(440) 已委任花旗銀行為顧問，協助放售大新人壽事宜。受消息刺激，大新金融一度爆升12.1%，高見39.9元，收市則報38.85元，升3.25元，漲9.1%，成交4719.8萬元；大新銀行(2356) 曾漲6.8%，收報12.4元，升2.31%。
市場傳聞係，目前集團與數個第三方潛在買家進行初步接觸，能否達成協議仍難評估，交易最終若能成功，估計金額涉資約40億至50億元，等於集團市值的四成左右。
銀行係大新系金蛋
嚴格而言，保險業務係大新金融持有，同大新銀行無關，大新銀行跟升，多少係憧憬賣完壽險會唔會唔賣銀行呢？因為同壽險比較，銀行先係真正的金蛋。家大新金融持有74.6%銀行權益，以大新銀行昨日市值計，呢批股權已值130億元，比起壽險公司值錢好多。要留意的是，大新金融家市值173億元，仲低過帳面值，若然出售理應可以賣高過帳面值，換言之如果大新金融肯賣，隨時值250至300億元，正因為呢個理由，所以大新銀行股價聞風而動。
香港家有好多呢啲超值公司，關鍵係大股東唔想沽貨，肯沽有人會接。大新系過去做得唔錯，令大股東王氏家族無意放棄控制權，但喺內資不斷湧港下，港資生意唔易做，若然唔趁好價出售，會唔會蘇州過後無艇搭呢？畢竟銀行唔同物業，必須不斷經營，所以市場一直無停過憧憬賣盤的原因，不過，呢類博賣盤股，要非常非常有耐性至好考慮。
陸羽仁
金融High Tea 舊文
來源 source: http://hdfin.stheadline.com
