本地或提早加息
2016年01月19日
美股大插之後昨晚無市，港股昨日低開，但一萬九千點關口守住。由於阿爺出招要求參與人民幣交易的外資行要交存款準備金，變相收緊海外人民幣供應，有穩定內地市場作用，人仔離岸價回升0.6%，內地股市反彈，恒指中午前略回穩，最後跌283點，恒指收報19237
點；國企指數收報8134點，下滑101點，買意仲係弱，成交只有750億元。跌得較多係本港地產股。港元轉弱，若然情況持續，市場水緊，香港可能提早跟隨美國加息，地產股於是又跑喺前頭，跌贏大市。
去年12月美國七年來首度加息，香港由於有大量資金泊入，令銀行水浸，故此未有跟隨加息。市場原本預計，香港最快要今年下半才開始加息。估不到過完年資金市場可以變得咁快，過去一個星期，港元匯價回軟，仲一度插穿7.8水平，高盛估港元會反覆回落到7.85左右，令市場人士關注會唔會香港利息上調機會增加，因為港元跌到金管局的弱方保證水平時，金管局既會入市買港元支持匯價，銀行亦要加息減少資金外流壓力。財經事務及庫務局局長陳家強喺評論港匯時，都講到有呢個可能性。
抵買但唔一定要買
以家港元結餘規模，話港息好快跟加仲係言之尚早，但大家都估加息浪潮比想像中近，令地產股明顯受壓，加上《施政報告》重申唔會咁快撤樓市辣招，基金無樓沽就沽地產股，故此昨日創一年新低的股份，唔少都係本港地產股。新地(016) 收報84.35元，跌近3%。恒地(012) 收報41.65元，跌0.24%，另外長地(1113) 、新世界(017) 、九倉(004) 、信和(083) 都創一年低位。
利息向上、供應增加，本地樓市有壓力唔在講。睇番地產股，龍頭新鴻基地產一年來高位喺137.6元，最新收市84.35元，下調咗38%。家佢市盈率跌到7.6倍，息率去到3.97厘，新地過去好少出現咁高的股息回報率，所以早幾日大股東郭老太都出來增持。
地產股大股東不時都會增持，但參考價值人人唔同，好似恒基李四叔，佢時時都出來買，高又買、低又買，你無佢咁多銀，跟佢買真係跟到手軟。郭老太買貨無四叔咁多，基本上佢喺100元左右先開始入貨，家個價比郭老太首批增持價平15%。雖然係咁，但大市跌得比想像中急，即使跟郭老太都預定要捱價。
地產股大股東同小股民的買股思維有所不同，大股東買貨係超長線，買完好少賣出，小股民就無包袱，出出入入都得。大股東買貨就如股價穩定器，股價低佢哋就入市，唔等如佢哋買完一定唔會跌。
從基本角度睇，家地產股確係大件夾抵食，但有幾點要留意，一係樓市家先開始下行，幾時到底好難講；二係本港利息未加，唔好話見頂，即係壞消息仲未出；三係地產股唔淨係睇資產值，都要睇盈利同買地成本。雖然地產股市盈率普遍偏低，但若然樓價下跌，盈利同息率都可能回落。綜合咁多點，家地產股係抵買，但唔係超值，若以長線投資計，抵買亦唔一定要買，仲要計計自己條數。若然手頭無貨，買啲做貨底無所謂，若然已經有貨，咁就要計計自己手頭子彈先好諗啦。
央行出招鎖2450億人仔
港股喺美國急插下仲頂得住萬九點，相信同人行繼續出招守住人民幣離岸價有關。人行宣佈，自2016年1月25日起，對境外金融機構在境內金融機構存放，執行正常存款準備金率政策，即是要交17.5%存款畀人行，變相抽緊海外人仔供應。
匯豐銀行分析師估計，人行此舉將鎖住約離岸2450億元人民幣流動性。出呢招後離岸人民幣(CNH)即大幅上揚，一度高見6.573兌1美元，升409點子或0.62%。
陸羽仁
金融High Tea 舊文
來源 source: http://hdfin.stheadline.com
