中環在線 - 李華華 2016年3月23日
中環在線：每日遊水一至兩粒鐘
88歲四叔按摩養生
超人李嘉誠與恒地（012）主席李兆基（四叔）近期先後為香港經濟與樓市把脈，計計數，兩人今年88歲，頭腦依然相當清晰，四叔前日講樓價最多跌三成，仲笑現場記者唔識計數。原來呢位老人家除咗每日做運動，仲有一個養生招數，就係每日搵人按摩。
每日讀報緊貼時事
四叔前日自爆𠵱家多數留在家中，只返工兩小時，咁佢在家做乜東東呢？孫仔孫女返學，佢冇理由成日在家湊孫啩。原來佢好識養生之道，每朝起身就做運動，每日都要遊水一至兩粒鐘，之後可能會耍嚇太極或者散步，總之就要周身鬱喇。
除咗每日遊水，佢仲會搵師傅上門幫佢按摩一至兩粒鐘，真係諗起都覺得疏肝。雖然佢話減少返工時間，但每日撥至少兩粒鐘讀報紙，又睇廿四小時電視新聞，總之要緊貼時事，點都唔做老懵懂。
註冊中醫師楊明霞都話，老人家得閒做按摩的確有助養生，平常人唔能夠日日搵人按摩，就可以自己按。佢教話，平時可以用中指按一按頭頂嘅百匯穴，每次按十幾秒，就有醒腦功效，有助提高記憶力，改善睡眠質素。
對於一啲日理萬機嘅人，由於佢哋成日都要望實電腦或者要閱讀大量文件，眼睛容易疲倦，佢就建議大家得閒用中指或無名指，垂直上下按摩眉頭、眉中與眉尾位置，有助養肝氣。
不過，講到尾，養生最重要係食得清淡、健康，仲要保持心境舒暢，食得、瞓得、便便暢通就very good嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
