債轉股成敗未知
2016年03月23日
上證指數回彈上三千點後，開始出現壓力，昨日收市再度跌穿呢個心理關口。內地股市今個月反反覆覆，但整體仍算向上。阿爺出明招暗招托住股市、樓市，以圖保住經濟。
去年第三季起內地股市暴跌，但最驚嚇係之後人民幣「入籃」，隨即一度急挫，搞出個全球貶值恐
慌。阿爺見到咁形勢，即刻拉閘放狗，同睇淡人仔的大鱷砌過。經過一輪對撼，人仔形勢初步穩定下來。呢排人仔匯價穩中有微升，市場仲傳話人行透過衍生工具市場，托高人仔匯價。
人仔危機暫緩，阿爺有空間搞搞其他動作去調整經濟結構。兩會期間提出銀行將債務轉為股權，以圖扭轉殭屍企業的經營，盤活經濟。呢個政策提出後，好快已經出台試行。
中行做咗鎔盛大股東
據內媒引述民營造船業巨頭熔盛重工(母公司更名為華榮能源)早前的公告，由於造船市場低迷，集團出現經濟困難，建議進行債務處置，擬向債權人發行股票，包括向22家債權銀行發行約141億股，合計141億元人民幣；向1000家供應商債權人發行30億股，合計30億元人民幣，以抵消171億元債務。
據了解，目前22家債權銀行中，已有12家債權銀行簽訂意向書，佔債務總額89%。根據媒體披露，熔盛重工本次發行完股票後，中國銀行(3988) 在總股本中的持股佔比將高達14%，債轉股完成後將成為最大股東。有人就關注稍後內銀公佈業績，這類債轉股的項目有幾多。
銀行入股企業，被視為脫離本業，老外對呢種做法不看好，認為咁樣會削弱銀行的風險控制。不過，銀行透過債務重組持有債仔公司股權，呢樣並唔係中國發明，過去就算香港的銀行都試過，最經典係當年和黃陷入債務危機，最後被匯豐控制咗股權，最終匯豐大班沈弼決定幫佢搵好人家，結果將股權售予長實集團主席李嘉誠，匯豐甩身之餘，仲多咗個長期大客仔。
所以，銀行入股企業，應該視為最後手段，亦唔應該變成經營者，而係盡快將公司賣俾識得經營的企業家，一如美國政府喺金融海嘯接收了AIG，一樣係趁公司業績穩定後退出。
今次中國銀行做咗熔盛大股東，對股東嚟講唔可以話係好消息，能唔能夠將壞事變好事，就要睇管理層能唔能夠將包袱變番資產甩番出去，暫時未知成敗。
市場氣氛觀望，港股全日升升跌跌。恒指收報20666點，跌17點；國指收報8900點，下滑28點；成交654億元。收市後歐洲股市就因為恐襲插低。
新中爆離奇夾倉疑雲
新世界發展早前提出以每股7.8元私有化新世界中國，計劃已經截止。新世界中國(917) 突然離奇大升逾三成，股價遠高於新世界發展(017) 提出每股私有化作價。癲完一輪後，新中收市報9.5元，仍比私有化作價高近兩成。理論上若果私有化成功，公司會按私有化價錢退場，若然私有化失敗，除非有第三者出手，否則股價都會回落。由於新世界牢牢控制住新中控制權，第三者基本上不存在挑戰成功機會，所以只能用個癲字嚟形容。
市場解釋係話因為新世界近期猛賣廣告叫人接受私有化方案，令人以為唔夠數，所以沽空佢，唔知昨日OK咗，沽空盤被夾爆倉。除咗呢樣，暫時搵唔到乜理由佢股價會咁樣。
自業績公佈後，長實(1113) 開始在市場回購股份，是長和系重組以來首次回購。公司連日在市場回購股份，股價昨日逆市走高，現造49.6元，升4.5%。
陸羽仁
金融High Tea 舊文
來源 source: http://hdfin.stheadline.com
