中環在線：
四叔牛一 大宅擺16圍
菜單曝光 有魚翅官燕壽桃
■噚日係李兆基87歲牛一，當然唔少得食壽桃。
生日快樂呀！噚日係恒基地產（012）主席李兆基（四叔）87歲牛一，按照慣例，佢晚上喺半山麥當勞道惠苑大宅筵開十幾席，請親戚同埋恒地高層食飯。聞說，呢餐飯，每年菜式都好名貴，一定
有最靚嘅魚翅同官燕，最尾就有熱辣辣蛋黃蓮蓉壽桃。
四叔生日其實好易記，就係每年農曆正月廿九日，佢多年來都會請家人、同事到屋企食晚飯。初時約有8圍，即大概80人；近年隨著恒地高層同事增加，佢嘅孫仔孫女數目越來越多，淨係講兩位公子，加埋都有7名孫仔孫女，所以圍數都越開越多，今年就約有16圍，過百人參加；咁多圍數，仲要分開喺佢大宅兩層樓擺㖭呀。
而賓客們通常7點左右到，開席前，四叔嘅家人、孫仔孫女就會圍住佢唱生日歌，然後切蛋糕；8點左右開席。
福臨門到會
四叔一直都係幫襯「富豪飯堂」福臨門到會，每年都有靚魚翅、椰汁燉官燕等等，話明係壽宴，當然一定要有熱辣辣壽桃同長壽麵喇。四叔可能幾鍾意食柑，好似話生果盤多數有柑㗎。
可惜，恒地噚日股價就唔多靚仔，收報45元，微跌0.7%；好在另一隻煤氣（003）就升0.3%，一正一負當打和。不過又咁講，四叔又點會理會恒地股價一日升跌吖，過去幾年佢不停增持恒地，股價跌，佢分分鐘仲買多啲㖭呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
