Money Walker：熊二入市勿忘對沖
環球進入risk on模式，風險資產齊齊被炒起，除咗博股市短線會有一輪反彈之外，筆者亦傾向喺呢輪熊市二期反彈浪之中，尋找低吸避險資產嘅機會。
近幾個星期美國政府債ETF跌咗唔少，筆者反而覺得係吸納的機會。美國投資市場由炒通縮
憂慮轉為炒通脹重臨，而美債價跌、金價上揚，正正就係市場以通脹作為炒作主題所致。不過筆者相信，目前呢個市場走勢唔會持續太耐，因為一旦油價再跌，美國通脹升溫嘅預期亦都會隨之煙消雲散，繼而觸發股市向下。
如果要博股市反彈，但又怕油價突然轉跌，不妨分段吸納美國上市嘅美債ETF作為對沖工具。因為油價一旦再跌，通脹預期就會再次降溫，屆時股升債跌嘅情況亦會完全逆轉。
美債ETF分不同年期
值得留意嘅係，美債ETF有分買唔同年期美債，例如係專買廿年以上長債嘅iShares20+美債ETF（TLT），亦有專買短債嘅iShares短期美債ETF（SHV）。
短期美債ETF回報會低啲，因為短債相對於同類型長債，派息會低啲，所以只能當作純避險資產，唔可以期望會大升。至於長期美債ETF，回報就吸引好多，但係利率風險亦都同樣高好多，意味著一旦美國加息，呢啲專買美國長債嘅ETF表現亦都會差啲。至於點揀，就要視乎你認為美國再加息嘅空間有幾大。
講到尾，全心博股市反彈，定係喺博反彈嘅同時亦都保守啲買美債對沖，要視乎閣下點睇環球經濟前景。筆者傾向睇淡環球經濟，亦對油價已經見底冇乜信心，基於上述原因，筆者相信熊市短期內都未完，所以一定會做對沖。
El.
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com
