Money Walker：
孝順先叫阿媽坐艇
中國行番谷內房支持經濟嘅舊路，加上油價因為憧憬石油生產國減產而反彈，刺激師奶最愛嘅澳元翻生。
澳元由今年1月中嘅低位起計，至今已經升咗接近5%，兌港元就快掂到6算。唔少人都認為澳元只係短線反彈，包括筆者自己，仲有專家建議
趁澳元反彈就好快啲走，換馬去啲優質收息藍籌。不過筆者認為對於一眾買咗澳元坐艇嘅師奶嚟講，呢個策略未必適用。
師奶買澳元就係貪佢夠穩陣同簡單，始終買藍籌股又未必夠錢買，而且今時今日好多藍籌股都唔見得有幾穩陣。
做澳元定期，少少地一萬幾千蚊入場就得，而且澳洲破產嘅風險，理論上點都低過一間上市公司破產嘅風險。更重要嘅係，做澳元定期有幾厘息收，就算今時今日澳洲係咁減息，澳元定期都仲畀到一厘息你。喺負利率嘅世界，有一厘息收可謂相當幸福。
除咗澳元，仲有乜嘢投資集齊上述優點？就係紐元，可惜影響紐元嘅因素同影響澳元嘅因素好相近，所以換馬去紐元冇乜意思。
作為一個師奶，如果唔等住拎筆錢出嚟用，買澳元純粹係收息抗通脹嘅話，筆者覺得繼續做澳元定期都冇壞。
畢竟香港藍籌股已經今時不同往日，20、30年前正值香港經濟起飛期，買藍籌股真係可以做到資本增值，但金融海嘯後嘅時代，香港已經變成一個唔適合價值投資嘅地方，優質藍籌有就有，但真係唔多。與其叫阿媽由澳元換馬藍籌股，作為仔女我寧願叫佢繼續坐艇，總好過阿媽亂買著隻不知所謂嘅藍籌。畢竟澳元會跟澳洲經濟周期走，跌完總有升番嘅一日，但沒落咗嘅藍籌股就唔會。
El.
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com
