一周三件：聯塑價低要兜
■聯塑有水利工程護航，主打瓣數之一嘅塑料管道長食長有。圖為集團主席黃聯禧。 資料圖片
中國聯塑（2128）有上萬億元水利工程護航，主打瓣數之一嘅塑料管道，已經長食長有，明年得番4倍PE；加埋電貿平台，又有肥仔增值潛力。現在趁聯塑喺其三年海底價，要兜。
先睇資料
。內地計劃在2020年前，啟動172項水利工程，上年已啟動嘅，得28項。即係話，喺嚟緊五年，絕大部份水利項目都會開始動工。而最新已啟動嘅85項工程，總投資額，係講緊8,000億元（人民幣．下同）。
食正水利國策優勢
中央為提高城市蓄水能力，亦貫徹住「海綿城市」國策，計劃喺2020年前及2030年前，將具有現代化下水道系統嘅城市分別提升到20%及80%。「十三五」期間，呢瓣總投資額，亦講緊1.2萬億元。
聯塑上年EPS得4%增長，但上邊睇到，集團管道瓣數都有大把米路；尤其水利工程，嚟緊先係項目動工高峯期，支持聯塑重拾動力。場內專業評估，亦係咁估。預計聯塑今、明兩年EPS分別係0.75港元及0.84港元，增長21%及12%，明年得4.7倍預測PE！
聯塑主打五金、電氣同建材產品嘅電貿平台「聯塑商城」，上年開波，全年營業額已經講緊6.2億元，而下半年電貿收入係講緊4億元，又係上半年2.2億元嘅1.9倍。聯塑電貿個頭開得靚仔，兼越做越有。而電貿平台煲得掂，聯塑中線又有分拆concept，兼有勁肥仔增值效應。
唔扯咁遠，聯塑今年增長開turbo，已經有得諗。煲聯塑，現價4港元當翻半番到6港元計數，明年預測7倍PE，都仲未上到上市以嚟平均8.8倍PE水位！
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com
