中環在線：
Talk show拍宣傳片
黃國英搵忌廉哥助陣
■愛貓之人黃國英，同忌廉哥齊齊拍talk show嘅宣傳片。 受訪者提供
尖東明星貓「忌廉哥」長駐嘅報紙檔下月底結業，要暫時同粉絲講拜拜，本身係貓奴嘅基金經理黃國英（Alex）就把握機會，打算搵埋忌廉哥合作，幫手宣傳佢6月
中嘅talk show。星級貓殺入財經界，唔知有冇火花呢？
■黃國英屋企養有4隻貓。 受訪者提供 屋企養4隻貓
今年冇乜升市催化劑，搞到港股靜過鬼，邊度有咁多人想去聽財經講座吖，難怪Alex今年為咗谷talk show銷情，出盡法寶，除咗宣傳海報玩造型兼搵航空公司贊助機票，佢下星期就會搵埋忌廉哥拍片，再配上對白，計劃今個月底前完成放上網做宣傳。
Alex話，今年talk show嘅目標觀眾包括一班平時唔多留意財經嘅人，內容會盡量易理解。而佢搵忌廉哥做宣傳，亦係希望可以吸引呢班人嘅注意。
查實Alex一向係愛貓之人，屋企養有3隻波斯貓同1隻異國短毛貓，最細8歲、最大都12歲，佢仲周不時上載愛貓相片影片同網友分享，唔怪得會諗到用貓宣傳呢條橋，不過呢幾隻貓今次就冇份客串。
至於Alex同忌廉哥嘅淵源，原來佢有客戶同忌廉哥主人高先生係好朋友，佢因而識到忌廉哥，仲好friend咁話，所以佢一提出要求，高先生冇say no。
為報答忌廉哥，Alex打算捐款畀2013年底創立嘅「忌廉哥慈善基金」，金額保密。基金主要幫助流浪貓狗，同埋宣揚正確對待動物嘅觀念，大家互相幫忙又可以做善事，幾有意義。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
