智取大市：成交一縮就要收工
■港股昨日主板成交847億元。 資料圖片
港股星期三大升市，單日主板成交900億元以上，之後一日有847億元主板成交已算叻仔，未來要每日保持咁上下交投，仲要恒指拿拿聲突破高位21511點先夠強，否則氣氛冷卻，好嘅話就只係進入一兩個星期整固，唔好就重拾跌勢。
大成交接地氣嘅因素太重要，因為要講多次，H指升到9237點，已經去到歐債危機至今嘅密集區域，冇番連續單日800億、900億元成交，根本難以夠動力去掃除蟹貨，刺激H指破位。換個角度睇，成交一縮，升市就要收工。
量度動力固然重要，但都要望嚇滙市形勢。亞太區股市急升之際，美滙指數同時急彈，同小弟構思升市劇本有所出入，滙市怪怪地向壞方向走，而股市卻急升，有點懷疑呢幾日急升係趁時日無多，一次過耗盡購買力，加速港股見頂，然後派貨。真正亢奮嘅升市未必有條件出現，下一步等成交縮減，就足以確認呢一點。噚日好炒嘅二、三線股唔多，尋寶有點難，反彈浪龍頭嘅資源、貴金屬股更加逆市腳仔軟，趁翠如BB股爆出，卻引來資金追捧一批貨乾而冇質嘅半新股，或許炒到尾水，種種跡象令人感覺不太良好。
如果升市要收工，打後嘅日子你估唔到係調整還是跌市重臨，冇理由揸太多貨硬食跌浪。若前幾日有食最juicy嘅打遊擊時段，不妨趁目前有利潤在手，食糊再等下次機會。
晉佳
http://facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
