中環在線：特首女醜聞 國泰前CEO表態
陳南祿：自己拉行李
■陳南祿被問到對「行李門」事件嘅睇法，話行李一定係自己拉住。 
近期特首女「行李門」醜聞，公眾討論得樂此不疲，咁啱花旗噚日舉行財經新聞獎頒獎禮，恒隆地產（101）董事總
經理（CEO）陳南祿係座上客，佢係國泰航空（293）前行政總裁，當然被人問佢點睇喇。咁佢出名說話圓滑，冇答對定錯，只係話「永遠拉住自己行李行」。
其實當頒獎禮主持人一問陳南祿行李事件，陳南祿個樣都有些少尷尬，華華估計，佢可能覺得身份尷尬喇。佢離開國泰都有5、6年，「行李門」發生後，一直唔見國泰高層開腔，反而要問佢呢位國泰前行政總裁；加上佢𠵱家老闆陳啟宗係忠實梁粉，陳南祿真係點答都左右不是人。
自嘲馬仔有進步空間
喺咁嘅情況下，佢唯有只講自己，答話「我就永遠拉住自己行李行」；再問落去，佢都係話「唔知有乜情況，我就揸住自己情況」。其實佢都答咗喇，而廣大市民應該都認同，自己行李自己攞喇，唔該。
唔講行李，身為馬主與馬董嘅陳南祿就講馬仔。佢出名冇馬運，佢都自嘲，自己嘅馬仔永遠有進步空間，由包尾改善至尾一、尾二……尾四，但距離拉頭馬仲有一段距離。雖然如此，陳南祿冇放棄養馬，仲準備添多匹，𠵱家正煩惱緊改乜名。
主持人即刻又抽水，建議佢隻馬叫「特事特辦」，陳南祿就提出自己要求，要有「天」同「地」兩個字夾埋，但叫「頂天立地」又唔得，咁咪即係企硬唔會跑？大家不妨幫佢諗諗個新馬名！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
