獅王大夾倉
2016年04月22日
油價繼續反彈，帶動曾經驚因為油企財困要大撇帳的銀行股急彈，同場就上映咗套「獅王大夾倉」。
匯控(005) 管理層在非正式股東會上透露，考慮回購及維持漸進增加派息，匯控股價隨之回彈，但大摩吹響摩笛追魂，變成好淡攻防戰。外資睇淡匯控，除咗話佢貸款
質素可能受油價急插拖累外，仲唱佢不斷出售資產，其中特別喺美國嘅生意，令佢無法受惠復甦，盈利缺乏增長，為咗增加殺傷力，大摩搞出個28元的終極目標價。
大行咁唱淡，令匯控管理層壓力好大，呢個係佢哋不惜拋出考慮回購撒手鐧嘅原因，因為佢咁講即係話少做生意，靠拆骨都可以推高股價。最近半年，匯控不少股份落入咗大媽手上，佢哋接咗唔少基金股份，加上匯控股價太低殘，所以一夾就上。
索羅斯仲未認輸
呢排匯控嘅夾倉，唔多唔少同大氣候有關。日前，大鱷索羅斯旗下基金業績，顯示佢今年來蝕咗4%。索羅斯喺農曆年前後高呼中國會爆發完美金融風暴，大力叫沽股，但金融市場跌勢俾阿爺拉閘放狗夾乾離岸人民幣托價撐住。
雖然暫時落咗下風，但索羅斯出席一個論壇時堅持，目前中國經濟主要以信貸拉動增長，與美國2007至2008年金融海嘯的情況非常相似，擔心很快會出現一個臨界點，引發全球經濟衰退，對於人民幣匯價參考一籃子貨幣定價，佢就話係健康發展，好過死釘住美元。從索羅斯嘅表現睇嚟，大鱷唔係好相與之輩，就算暫時收兵甚至反手造好短炒，適當時間又會走出來再插過，關鍵係阿爺能唔能夠在借來的時間，盡快穩定番經濟，至少保障唔會出現硬着陸。
在獅王發吼下，港股高開後持續飆升，恒指急升385點，收報21622點；國企指數收報9248點，上揚113點，成交730億元。匯控升4.4%，收報52.9元。
半新股繼續癲，由宏安(1222) 分拆的宏安地產(1243) 繼續喪炒，收市報2.58元，升34%，較招股價0.92元翻咗兩番。佢上市只接獲1123份申請，超額認購2.93倍，相信貨源好歸邊。
講到炒股仔，喺呢啲唔係咁旺嘅市始終唔容易。近日陰陰升嘅南華金融(619) 突然宣佈大折讓供股，股價應聲急插，收市跌咗22%，收報0.127元，搭順風車者即時跌咗落地。
南華金融撻散戶落車
根據南華金融宣佈，計劃以「一供一」進行供股，每股供股價0.066元，比上日收市價0.163元大幅折讓約60%，預期所得款項淨額4.89億元，連同去年供股後尚未動用8000萬元，合共5.69億元，當中2.63億元用於擴大貸款；2.8億元於中國成立證券合資；2000萬元用於擴大配售及包銷業務；餘額用作發展經紀業務及一般營運資金。
南華金融去年下半年先供過股，睇番公司集資中有一半係用嚟貸款，其實係無逼切需要向小股東再抽水。中環茶友話呢個月佢炒上，成交大咗，唔排除外有股票外流出街，家突然話抽水，捧場股民即係碌低。
今次平價大供股，會安排公司主席吳鴻生持有嘅寰輝做包銷商去悉數承購上述供股股份，咁做可能導致包銷商及其一致行動人士股權由31.02%增至佔擴大後股本65.51%，並將申請清洗豁免強制性收購，不過唔知證監應唔應該畀佢豁免呢呵？
陸羽仁
金融High Tea 舊文
來源 source: http://hdfin.stheadline.com
