做基金股要炒概念
2016年04月07日
過完業績期，大行呢排不斷發表業績後報告，成績有人歡喜有人愁，好似大笨象匯控(005) ，就俾摩笛追魂，摩根士丹利出報告話，基本上將匯控目標價由51元降至45元，但最熊價見28元，搞到匯控立即腳軟，插落45.95元水平，再試今年低位。
根據
大摩報告，估計匯控首季全球銀行及資本市場業務受壓，只會跟同行有23%增長，並將2016年收益預測下調10億美元至530億美元水平，比市場預期低7%。香港市場作為匯控盈利主要來源，預期今年收入放緩2個百分點至5%。在正常情況下，大摩給予匯控45元，但比上次目標價已調低12%，評級為「減持」，若增長顯著放緩，盈利無增長，又要大幅減值撥備，到時匯控股價可跌至28元。
大笨象呢排有啲黑仔，黃之鋒想搞政黨，去銀行開戶被拒，跳出來質疑匯豐係政治審查，變相擺銀行上枱。咁啱同一時間又俾摩笛追魂。中環茶友話，匯豐早前派成績表，好努力咁撐住派息，但老外第二季好似想做淡，喺咁環境下唔唱衰大笨象，好難大力質低個市，所以有理無理打兩鎚，搞出個所謂最熊價28蚊嚇吓人。茶友話，本來呢啲極端估計，好多時聽來得啖笑，但由於聯儲局呢輪放白鴿，利率上調步伐減慢，大銀行息差暫時無得拉闊。再加上呢兩日爆出一大堆「巴拿馬文件」，外界怕搵出好多大銀行幫人逃稅證據，令匯控呢啲大銀行再被人罰餐飽，歐美的大銀行都急跌，令匯控股價雪上加霜。結果匯控昨日成為包尾的藍籌股，收造45.95元，挫1.7%，為09年以來最低。渣打(2888) 同時捱沽，收造48.15元，跌1.2%。
大行睇淡大笨象，一來係驚佢喺外國有好多調查要應付，尤其係美國，呢樣嘢解釋咗點解佢家開戶審查咁嚴，寧願食少多覺瞓；二係擔心佢若然再因為呆壞帳撇減，資本比率有壓力，咁就頂唔順要減少派息。佢家派息有8.6厘，咁好息真係有啲too good to be true(好到你唔信)，反映市場預咗佢呢個息率未必能維持，所以股價先跌落嚟，反映減息嘅預期。
大行睇好舜宇光學
呢排工業股輪流炒。上個月陸羽仁分析過嘅舜宇光學(2382) ，唞一輪後大力爆上，創上市新高，曾見25.65元，大升19.6%，收造24.25元，飆升13%。佢咁當炒，一個理由係內地科技巨企華為周三公佈新旗艦手機P9，市傳將備有雙相機鏡頭，舜宇作為華為主要零件供應商，隨即受追捧。
舜宇主要做鏡頭，2015年公佈業績增長35%，集團係業績報告透露會繼續投入資源，提升手機鏡頭及手機照相模組的產品結構，提高該等產品的市場份額。同時，集團將繼續探索光學新興應用，尤其是在移動終端的創新型光學應用方面，確定重點的新興業務，實現從綜合光學產品製造商向智能光學系統方案解決商的轉變。有人因為呢啲描述，炒作佢發展虛擬實景(VR)的前景，變成一隻概念股。自佢業績公佈後，多間大行睇好，早前麥格理就認為業績反映集團2015下半年利潤改善情況比預期佳，目標價由28元升至32元，續予「跑贏大市」評級。
舜宇現時市盈率去到29倍，息率得番1厘，已經唔係靠盈利同派息支撐，而係靠明天會更好的概念支撐，由於佢市值膨脹到260億元以上，成為基金愛股。家市場鍾情一啲流通量大，技術有優勢的工業股。
伯恩研上市 或炒影子
市場傳聞專做手錶玻璃的伯恩光學研究緊上市，集資額以百億計，由於有大嘢等緊上市，炒家來個大合奏，搵相關股份先開個派對就一啲都唔奇啦。
內地經濟數據佳，3月財新服務業PMI好過預期，綜合PMI更重上50的盛衰分界線上，港股連跌三日後叫做反彈，大市先跌後升，恒指漲29點，收報20206點；國企指數收報8668點，下跌10點或0.12%，成交縮至583億元，咁嘅成交，其實都係唔見得有乜力水。
陸羽仁
金融High Tea 舊文
來源 source: http://hdfin.stheadline.com
