中環在線：
李家誠學老竇捐助本地大學
■科大校長陳繁昌（右二）、副校翁以登（右）出席由李家誠夫婦主持嘅支票移交儀式。
恒基地產（012）主席李兆基（四叔）同唔少富豪一樣，鍾意捐錢畀大學，除咗最近獲正名嘅香港教育大學，基本上香港所有大學，四叔都有捐過錢，新近佢位二公子李家誠亦捐1.5
億元畀科大，用作興建一幢全新創科大樓，大樓將會命名為「李家誠創科大樓」。
呢次係李家誠首次捐錢畀本港嘅大學，過去主要捐畀北大旗下學院。科大校長陳繁昌前日就上去恒基總部做個簡單嘅接收支票儀式，李家誠位靚老婆徐子淇當然有份出席支持老公啦。
冠名建創科樓
華華忽然醒起，城大胡法光運動中心個綠色屋頂早排塌咗落嚟，城大應該要籌錢重建，有傳話花費超過10億元，佢哋不妨考慮向本地家族企業嘅富二、三代埋手，事關佢哋爸爸成日捐錢，未必有興趣再用自己名義捐，二、三代可能又唔同講法喎。
好似四叔咁，2007年，佢分別捐過5億同4億元畀港大同科大，加埋北大、清華同香港其他大學，多年來夾埋捐款超過20億元，今次改由二公子出面兼出錢，四叔似乎幾鍾意科大。
李家誠捐錢興建嘅創科大樓，樓高7層，建築面積8,000至10,000平方米，可以舉辦各種創業活動同講座，仲有研究中心。據聞，明年動工，約3年後落成使用。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
