智取大市：有鐵底的冷門股
■巨濤每逢唔好景，就每年收到一筆政府補貼；圖為集團主席王立山。 資料圖片
恒指高位一連四日現陰燭，調整壓力越嚟越大，自然冇之前咁易炒，嚟緊短時間內股份向上突破，實為陷阱嘅比率相信會提升至一半以上，如果保持係又衝唔係又衝嘅做法，輸錢概率一定高過一半。
喺高位進
入調整初期，通常仍有股升，呢一刻寧願將持倉控制喺低水平，採取精兵制，細細注吼冷門股仲有著數。巨濤（3303）上星期五升7%，成交只得百幾萬就可以有第一棍。呢隻股0.4、0.5元呢啲位，又真係輸極有個譜，上市到𠵱家，只係金融海嘯呢啲死人冧樓環境，先至明顯跌低過0.4、0.5元呢啲位，正常日子你想佢穿呢啲位都唔易。
佢股價喺過去大半年潛咗喺0.5元左右，原因一，前收市價0.57元計，市值僅4.5億元；原因二，2006年上市到𠵱家，巨濤每逢唔好景，就每年收到一筆政府補貼。舊年收入跌三成，純利只跌6%至2,671萬人民幣，純利跌咁少係因佢收到政府補貼有842萬人民幣，再次確認佢唔好景就有政府撐住，股價點都有個鐵底。
你唔知呢隻股幾時會復蘇，但目前處於極貼近鐵底水平，呢啲股小注放床下底，又或者長期備忘都得。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
