異動空間：點睇調整定見頂
■有落場炒嘅散戶就知，港股實際情況遠比指數走勢惡劣。 資料圖片
上周個市chok住創今年新高，但其實係好淡通殺的格局，有落場炒就知，實際情況遠比指數走勢惡劣。不過恒指高位四日三支跌市陰燭，再加一支射擊之星，落山只是時間問題，但重點係：已經見咗反彈高位？抑或回
到20日線再衝過？呢兩個情況對短期操作有頗大影響。
恒指呢轉最高23193點，距離去年10月反彈高位23423點不遠，亦可算完成大時代跌浪0.5倍黃金比率的反彈，如信股市最終會跟經濟走，睇反彈完確實夠曬理據。不過，全球央行放水新時代，股債金市浸滿銀紙也是不爭事實，仲有美國大選、意大利公投等政治因素，頂在高位橫行消化超買也是劇本之一。
判斷大市走向，短線可睇實二三線股走勢。深港通拍板，50億元市值以上恒生小型股指數成份股獲納入，如資金流出大價股，但二三線股繼續炒，反映資金仍戀棧股市，換馬是為指數走更遠的路，屬大利好訊號。反之，如指數調整而二三線跌得仲勁，成交急回至700億元樓下，則大事不妙，代表資金撤退，戰友宜沽貨避險。衝咗幾個星期，難得有得唞下也是好事。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
