經濟客艙：美債狂沽的啟示
■有統計估算中國於今年5月至6月期間，已減持300億美元的美國國債。 資料圖片
負利率新時代下，有種資產越賣越搶手，就係美國國債。聰明嘅中國人更利用呢種手段去搬錢離國，原來央媽背後默默成就中國式走資。
大家都知美國國債穩陣，跟黃金一樣被視
為避險天堂。不過，今年首半年各國央行賣走1,920億美元美債，是近40年最多。中、日、法、巴西同哥倫比亞成為掟走最多美債嘅國家。有統計估算中國單喺今年5月至6月期間，已減持300億美元嘅美國國債。但喺負利率時代，美國未肯定加息，美債仍然企穩1.5厘，亦無其他國債面臨貨幣貶值風險，回報睇高一線。
央媽沽出美債，換到美元保持流動性外，更重要有美金托住人仔，講到底央媽擔心人民幣持續貶值仲多過我同你。央媽賣走美債套現美金後，接貨嘅單位可能係國內企業單位或者大戶。雖然有外滙管制，有咗美國國債揸喺手，沽走後再買美股或者買美國樓又得，一來一回資金轉移離國又得咗。
美債被拋售其實我哋都要留心，如果喺今年12月前中國或其他國家持續沽美債，反映大家對美國加息預期升溫，但各國拋售美債所造成嘅震盪都及不上呢間央行強。如果有一日連聯儲局都沽走美債，好大機會搞冧個市，屆時要睇美國加息幅度有幾多，而唔再係「加唔加息」，因為儲局最終都出手，將無限量寬而造成過度彭脹嘅資產負債表縮細。希望儲局前主席格林斯潘講美國加息「快到你唔信」唔會係真啦。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
