中環在線：
梁粉退位 謝清海選港交所董事
■李君豪（左圖）獨董任期屆滿，港交所提議謝清海（右圖）接任。
被視為「梁粉」嘅東泰集團主席李君豪，做咗17年港交所（388）獨立非執行董事，終於要退位讓賢，今年4月股東會後退任，港交所提名委員會隨即建議有「股壇金手指」之稱嘅惠理（806）主
席謝清海擔任獨董。
港交所董事會共有13名董事，當中只有行政總裁一人係執行董事，其餘都係獨董，其中大約一半係政府委任，一半係股東投票選出。基本上，近10年都冇乜人願意出來爭做董事，應該話冇乜人有勝算，所以做開嘅董事都可以繼續做。
改例後最多做12年
好似李君豪，同另一位同樣於今年退任嘅獨董郭志標，兩位都係由2000年開始做到𠵱家，做獨董都可以做到17個年頭，認真長情。不過，港交所舊年初提出，獨董最多只可以做12年，所以李君豪同郭志標今年任期屆滿，董事會唔會提名佢哋連任，想繼續做，要搵股東提名。港交所於是提議，由謝清海同法巴嘅梁柏瀚接任。
謝清海話好榮幸被提名，作為基金界代表希望可以令交易所運作得更有效率咁話。
如果冇其他人舉手話要選，謝清海同梁柏瀚應該可以無風無浪做董事，唔似舊年咁，商品專家巴格瑞同對沖基金經理錢志健爭一個董事位，港交所開曬口叫股東選前者，惹來部份股東不滿。立法會金融服務界議員張華峰今次都好不滿呀，話港交所繼續忽視華資小經紀嘅聲音，唔知佢會否搵人出來選呢。
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
