杜指10萬點!
2017/02/28 09:28:59
網誌分類: 經濟
週一美股靠穩，杜指及標普500指數微升0.1%。杜指已經連升12日，係自1987年以來最長連續升幅，不過，比較當年，今次的累積升幅其實不多，杜指當年在12日內累升了9.2%，而今次只有3.9%。
美股持續做好，但又升
得不多，撐住撐住，固然係總統特朗普天天有新猶，日日在發功，但其實都只係「口惠實不至」，講的就多，實際的行動，甚至政策的細節，都未見到，投資者有所期待，自然不會沽貨，但亦不敢冒進，整個美股就變成一個等字啦。
大市這兩日就在等待特朗普今日在國會上發言，他昨日在白宮與多位州長會晤時表示，他會就基建投資上發表「重大」聲明，又話會大幅增加軍費開支540憶美元，而經費則來自削減優先程度較低的經濟發展項目，另外，又話政府將會「快速行動」，進行行業監管方面的改革。
相關股份馬上有反應，軍工股造好，例如波音飛機升1.1%，Lockhead Martin升2%。但整體平平無奇，觀望氣氛濃厚。投資者可能聽大方向已經聽得太多，現時最關心的是政策的細節。正如Warren Financial的首席投資官Randy Warren所講的，「依家係時候特朗普要兌現一些比較重要的競選承諾啦！」而有些分析則比較關心，特朗普的發言會集中在推動經濟增長的政策上，抑或是盡講一些人民喜歡聽的是空話。
昨日比較搶眼球的新聞，自然係股神巴菲特成為賺錢最多的「果農」，他買蘋果大賺16億美元！據路透社資料顯示，至2016年，股神旗下的巴郡共持有6120萬股蘋果公司股票，平均每股成本約110美元。股神接受CNBC節目訪問時表示，旗下的巴郡，在今年的1月1日起至1月31日蘋果公布業績前，買入1.2億股蘋果，令到持有的蘋果股份與可口可樂股份比重差不多，巴郡一共持有6120萬股蘋果股票，投資總額為67.5億美元，巴菲特購買蘋果股票的平均成本為每股110.17美元。蘋果昨日收136.93美元（52週高位137.48美元），單係這1.2億股蘋果，至今就有超過16億美元進賬。
股神接受訪問時解釋點解一向唔會買自己唔熟悉的股票，但今次買蘋果股票，主要原因係有一iPhones，就知道蘋果好有前途，就買蘋果啦。睇落道理好似好簡單，但你會唔會好似股神咁有眼光，同適時行動呢？我估股神答就答得簡單，幕後對蘋果業績都做咗好多分析。
另外股神對美股長遠前景好樂觀。雖然巴菲特早前還叫人小心股市會階段性回吐落「黃金雨」，但他今日接受CNBC專訪時，表示非常看好美股前景，預計道指最終將逼近10萬點，當前道指僅略高於兩萬點。
巴菲特話，市場目前沒有處在泡沫狀態。股市面臨的風險是利率上升。從利率水準考慮，當前的股市是便宜的。但股市無法預測，「沒准明天就會跌20%」。
他雖然不喜歡特朗普，但認為「從來沒有一位總統讓我想要放棄購買股票。」巴菲特話，美國國務卿Tillerson很理性，是自己會選擇的人選。儘管自己對某些政策並不認同，但美國經濟四年後會比現在好得多，他認為美國經濟在任何總統治下都會提升。
股神講到杜指10萬點，即使係10年、20年之後的事，都係一種大好友的評價。無論佢啱唔啱，都搶盡眼球啦。
陸羽仁
回應總數
陸羽仁 BLOG 舊文
來源 source: http://blogcity.me
