大棋局：金正男被殺謎團
■金正男日前在馬來西亞被殺。 資料圖片
情人節前一日，金正男死於女特工之手。先講一個東北亞大戰略之假想。假如南北韓統一，韓國會成為一個點樣嘅國家？一個有核武嘅國家，一個有先進科技及軍隊嘅國家，一個有龐大經濟體嘅國家，而且會輸出韓流具文化軟實
力嘅國家。如出現咁樣嘅國家，佢會係哪一國盟友？
同樣係2月，一年前嘅2月，日本《產經新聞》爆料美國將會對北韓最高領導人金正恩實行斬首計劃。南韓亦多次宣稱會成立特種部隊對付金正恩。斬首計劃唔可以曝光，曝光即假，起碼當下係假。咁高調去講有三個可能性：刺激金正恩，令佢緊張出錯，此其一；要北韓內部恐慌混亂，引對金正恩不滿嘅大臣思變甚至先發制人，此其二；要破壞某些進行中嘅計劃，令其中止，此其三。
再早些時候南韓亞運會閉幕，北韓三位高級官員突擊訪南韓並即日就走。呢件事特別之處，首先係突擊，北韓三巨頭去前一日先通知會嚟。三人分別為黃炳誓、崔龍海及金養建，時為北韓權力核心第二、三、四號人物。一年後金養建因車禍喪生，南韓傳媒報道是政治暗殺。
北韓三巨頭突擊訪南韓，被認為同習近平有關的微博賬號「學習粉絲團」表示「朝韓統一了是不是很無敵？」在中國立場，若南北韓統一，而此事由中國促成的話，中國有恩於韓國，韓國會成為中國堅定盟友，如此整個東北亞大戰略會扭轉。中韓同盟平衡美日台同盟，加上地利，中韓同盟實力甚至會淩駕美日韓同盟。但如果南北韓統一由美國促成，中國將被包圍其中。
呂不韋喺趙國做生意時認識當時做人質嘅嬴異人，立即發現此奇貨可居。後來呂不韋幫嬴異人返秦國爭位，並誕下一子名為嬴政。金正男留喺澳門亦奇貨可居，其被暗殺一事，意味可兩手準備嘅計劃要中止，還是東北亞局勢蘊釀大變，十年內有機會見證。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com
