港交所露底
2017年02月28日
美股上周連升11日，不過最後幾個交易日升幅都係蝸步前行，唔係幾夠力，港股升到咁上下也差不多，加上二月份期指結算，拉鋸情況甚為明顯，恒指全日跌40點，收報23925，國企指數收報10330，下滑87點，成交逾744億元。不過，個別板塊好似紙業、物流都
仲有炒作，顯示資金都唔係全面睇淡。
港股升左一輪後，個別發展明顯左，而家仲係炒緊業績期，所以資金仲係跟住藍籌派成績表嘅好唔好去炒，好似友邦(1299) 一度高見50.25元，創3個月以來新高，收報50.1元，升2.77%，為升幅最大藍籌股。呢排金融類股份公佈業績，基本上都受去年市況影響，就算做獨家生意嘅港交所，(388) 去年盈利57.69億元，按年倒退27%。而收入及其他收益111.16億元，同比減少17%，若扣除特殊項目，跌幅14%，消息影響下股價跌。
友邦績佳股價靚仔
去年港交所業績真係唔講得靚仔，首次公開招股集資總額雖然繼續蟬聯全球榜首，但較2015年減少25.8%至1953億元。新上市公司共126家。現有上市公司共集資2948億元，較2015年大跌65%。兩者集資總額合共4901億元，按年少55%。
交易市場方面，去年全年平均每日成交額較2015年大減37%至669億元，惟全年期貨成交合約按年升14%，至逾8400萬張。自去年第四季起深港通正式推出，惟第四季每日成交額按季跌6%，反映成交量偏淡。期內交易費及交易系統使用費減少37%至14.21億元，包括LME期貨合約等衍生工具交易收入則佔6成；聯交所上市費升一成至7.7億元；市場數據費達4.22億元，與去年相若。
除香港業務麻麻地外，港交所旗下LME公佈今年交易費將維持不變，另外亦推出一系列優惠計劃。去年，LME的金屬合約平均每日成交張數按年跌8%至61.86萬手，拖累交易費收入跌12%至1.74億元。業績後大行對港交所看法趨審慎。大摩指，港交所上季盈利表現遜預期，予「與大市同步」評級，目標價190元；摩通亦予「中性」評級，目標價196元。港交所收報195.4元，跌1.3%。
炒金融股要靠前景
港交所一向因為生意獨家受追捧，有中環茶友早就預告佢業績唔會好得，而家俾大行話佢業績遜預期，有多少露底感覺。佢睇完業績後話，實實際際講，全球金融市場去年表現唔係好標青，本地金融股炒上去，好大程度係炒憧憬。好似上星期兩間跨國銀行宣佈去年業績，都被評為唔靚仔，股價因此受壓。渣打集團(2888) 2016年度業績，普通股股東應佔虧損由上年的23.6億美元大幅收窄至4.78億美元；每股基本虧損0.145美元；但就不派末期息。呢個成績就被大摩評為差於預期，話佢股價偏貴，降低目標價至54元，渣打股價一度失守70元，低見69.9元，收報71.15元，跌2.73%。
早前滙控(005) 公佈業績，同樣被指差過預期，股價繼續受壓。大笨象去年第四季業績唔靚仔，主要同商業撇帳有關，但佢就維持派息。跨國銀行而家宣佈嘅成績表，仲係去年經濟較差嘅時間，市場期望佢地交出亮麗業績，似乎就早左啲，呢個反應好大程度係因為股價走得太快，股價升得多，期望自然高，所以見到現實情況就跌番落嚟先。至於派唔派股息，當然係有好過無啦，不過買股最緊要仲係睇前景，所以未來佢地嘅業績同股價經過調整後，都係要睇番全球經濟同利息係咪向上，帶動番盈利好轉。
陸羽仁
金融High Tea 舊文
來源 source: http://hdfin.stheadline.com
