中環在線：陳德霖吹雞
猛龍集金管局
■噚日陳德霖號召近百人參加研討會。
金管局總裁陳德霖嘅號召力有番咁上嚇喎，佢噚日搵來城中政商界名人齊集金管局，包括李澤楷、唐英年、王䓪鳴、鄭汝樺、範徐麗泰等，唔通佢又舉行造勢大會？查實佢哋全部係銀行獨立董事，參加銀行獨董研討會啫。
銀行獨董唔少都
係名人，噚日有近百人參加研討會，以閉門形式舉行，唔准錄音錄影，大家伺機「盡訴心中情」。
銀行董事呻生意難做
有參與其中嘅永隆銀行獨董、會計師公會前會長周光暉話，噚日有人趁機質問金管局做乜管得咁嚴，搞到銀行難做生意，有啲身兼企業高層嘅銀行董事，就大吐苦水，話因為銀行怕咗監管機構，企業開戶口越來越難，跟美國做生意仲慘，填表、交稅都一頭煙。
不過陳總只係喺研討會一頭一尾亮相，呢啲意見由其他主持會議嘅金管局高層接招，聽講佢哋解畫之後，班銀行獨董都收貨嘅。
研討會差唔多朝9晚6舉行，周光暉形容，台下成百條「猛龍」聽足全日書，係破天荒第一次，全國人大、政協，仲未計商界老闆，個個都有頭有面，唔會話瞌眼瞓咁失禮嘅，不過佢笑住話，大家去廁所去得幾頻密囉。
陳德霖做總結時就曬一曬文學修養，用「徒善不足以為政、徒法不能以自行」（《孟子．離婁上》），再加上自創嘅「徒利不可以為繼」，去勸勉銀行業要走穩、善之道。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
