趁住放鴿試高位
2017年03月17日
美國聯儲局宣佈加息四分一厘，最重要係議息聲講明會「逐步」加息，聯儲局主席耶倫出嚟解話唔係咁鷹，美股向好，再加上總理李克強係兩會結束講話向香港送大禮，令港股抖完一輪即刻爆上。
恒指大升495點去到24288點，直逼去年9月9日恒指高位24364
點。恒指上周弱弱吓，本周突然反轉夾淡倉，問題是呢次可唔可以上破高位，抑或來個雙頂就回。
聯儲局今次會議，焦點唔係加唔加息，而係會後議息聲明，聯儲局今次嘅講法係「委員會預期經濟情況的發展，可令聯邦基金利率逐步上升，聯邦基金利率在一段時間內，會低於長期水平。」「逐步」呢兩個字就值錢啦，市場理解逐步就係不會急促加息，咁今年加4次息的機會就下降咗。
正如我之前所講，只要聯儲局議息聲明無咁鷹，美元美息就會見好消息回吐，結果真係全線向下，其中美國10年期國債息由上午的2.6厘回落至2.5厘，2年期短債亦由1.4厘回落至1.3厘，同時華爾街股市上升，油價反彈、石油股上升帶動大市高開，杜指上日最多升過140點，高見20977，收市報20950點，升112點，將利好傳導到香港。
花旗睇國企上試11800
由於聯儲局鷹派程度低於預期，花旗銀行投資策略及環球財富策劃部主管張敏華話，該行預期今年聯儲局或會分別於6月和9月加息，即係加3次息，到12月則可能開始縮減資產負債表規模(即係開始收水)。當今年稍後美元開始弱勢時，會使有較多資金流入亞洲和新興巿場，該行預期2017年恒指目標只係24000點(現價24288點)，但國企指數有機會上試11800點(現價10526點)。即係話恒指已到價，國指未到價。
中銀香港(2388) 投資管理總經理陳少平就預計，美國聯儲局今年內最多加3次息，香港加息要待美國加息4次，意味明年香港才有機會加息。
聯儲局加息放鷹嘅機會其實唔係咁大，昨日送多港股一程，係國務院總理李克強透露，今年會啟動「債券通」。雖然普通人對買大陸債興趣唔大，對港交所(388) 即時生意帶挈應該唔多，但大行表示，內地向外資開放，銀行間債市和交易所買賣的債券，同時將銀行間債市的結算，與離岸結算設施連接。現時在港交所買賣的債券則會讓滬深投資者參與，估計流入內地債市的資金未來五年將達7000億至8000億美元。
美股有啲牛二味道
聯儲局放鴿，但美息向上係中期趨勢，而家美股有啲牛市二期感覺，炒緊經濟好之餘，其實開始有通脹憂慮，但股民多數係得快樂時且快樂，有機會就點都會炒番轉，日後下跌係日後嘅事。
港股係議息前抖咗幾日，昨日一舉衝上24000關，收報24288，急升495點，以全日最高位收市；國企指數收報10526，急漲253點；紅籌指數收報4006，漲87點，成交金額1022億元。藍籌股騰訊控股(700) 升3%，收報220.8元，積弱嘅油股反彈，中海油(883) 上升3.6%，收報9.13元。
本地地產股雖然近日係咁開盤，加埋海航第四度奪得啟德地皮，旗下香港國際建投以74.4億元由中標，應該利好短期表現。但係議息前大家都唔郁手，但到昨日下午就開始見到有炒落後嘞，地產股向好，新地(016) 升2.1%，收114.3元。
陸羽仁
金融High Tea 舊文
來源 source: http://hdfin.stheadline.com
