智取大市：乜股先係夠穩陣
■股票難捉路，資金繼續喪泊喺「穩陣股」。 資料圖片
「穩陣」兩個字，喺近期股票市場上，逐漸有新嘅解釋。
以前話股票穩陣，係形容下跌空間少、即使跌都唔會跌好多嘅股，中電（002）係，電能（006）亦都係。時而世易，喺近期港股慢牛之下，發現升市市寬差，上升嘅股票
數目唔多，跌股亦唔少。一旦唔夠眼光兼唔夠運，即使坐喺好友陣營，亦隨時跌股成手都係，升市輸到啪啪聲。跟手沽走自以為弱勢嘅股，然後追強勢股，更容易左一巴、右一巴，所以近排股市升，仍周不時聽到有戰友牙痛咁聲。
「穩陣」呢個詞語，變咗形容升市之中實會跟升嘅股票。近兩日升嘅幾乎集中於大股，今個星期包括科網股騰訊（700）、舜宇（2382），同埋近期嘅金融股滙控（005）、平保（2318），無論累積升幅幾多，都被視為「穩陣」。近排燃氣股都升得多喎？但係普羅大眾唔知佢升乜，買入驚要接火棒，所以燃氣股就唔算係新定義下嘅「穩陣股」。
坐功講求信心，信心又來自「穩陣」，難怪個個喺股票難捉路嘅環境下，資金繼續喪泊喺「穩陣股」，大勢所趨係冇得唔信邪，無謂搞咁多高難度動作，因為炒股票嘅嘢，做到「轉體翻騰三周半」都好，係唔會有額外獎金收嘅。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
