金融High Tea 2017年7月13日
人仔淡定 內銀有錢剩
2017年07月13日
恒指呢排好叻仔，今個星期連升三日，仲衝咗上一年高位，內銀股發力，成為升市火車頭。大市昨日再炒上，內銀股繼前日炒上後繼續造好，最大隻嘅工商銀行(1398) 發力升超過3%，收報5.19元，仲距離今年高位5.43元仲有一段水位，係正式嘅落後板塊。
內銀股而家普遍都仲係大件夾抵食，以巨無霸工行為例，而家市盈率係啱啱過6倍，息率仲高過5厘，同之前大家話抵買嘅滙控(005) 比，市盈率固然差好軟，息率都係不相伯仲。
內銀同大陸恐慌指數相反
內銀股估值咁低，主要係大家擔心大陸增長唔係咁掂，令呆壞帳增加，再加上擔心人民幣貶值，令到資金退避三舍。過去幾個月，大陸外匯儲備出乎意料連升幾個月，人仔匯價轉強。呢排內地繼續話去槓桿，人仔匯價都算硬淨，昨日中國外匯交易中心公佈，人民幣兌美元即期收報6.7875兌1美元，升咗125點子。
市場對大陸經濟硬著陸嘅憂慮減少，咁內銀股就炒番轉，所以內銀股可以當係大陸經濟嘅恐慌指數衍生產品嚟炒，當恐慌指數高，內銀股就無運行，恐慌情緒紓緩，咁佢股價就彈。內銀係巨型國企，基本上唔會執笠，加上有高息作為保險費，條件睇落好著數，買唔買佢，就要睇投資者對大陸前景嘅信心喇。
建行(939) 、中行(3988) 及工行為升市火車頭，建行升2.6%，報6.34元；中行升2.5%，報3.75元；工行仲成表現最佳藍籌，三股合共推升恒指115點。騰訊(700) 重上280元，升1%，報收281.2元；友邦(1299) 升1.4%，報58.4元，兩股合共為恒指貢獻57點。
結果恒生指數收報26043，升166點；國企指數收報10517，上漲101點，成交861億元。其他內銀股普遍造好，重慶農商銀行(3618) 升5.3%，報5.75元；哈爾濱銀行(6138) 升2.9%，報2.51元；盛京銀行(2066) 升2.5%，報7元；郵儲行(1658) 升2.4，報4.76元。
另一個造好板塊係燃氣股，華潤燃氣(1193) 升5.5%，報30.5元；新天綠色能源(956) 升5%，報1.64元；中國燃氣(384) 升4.7%，報18.92元；濱海投資(2886) 升4.3%，報1.7元。
大酒店炒賣產分紅
除咗中資股爆上，前日提到嘅「兩店」—信和酒店(1221) 同大酒店(045) 齊齊爆上。大酒店本身盈利穩定，唔會有乜驚喜，加上大股東嘉道理家族係三十幾年前曾被大劉狙擊，從此緊緊拿住控制權，理論上唔會被人敵意收購，係咁情況下點解會股價急升呢？
有中環茶友就就提供咗一個解釋，話大酒店有好多靚資產，就算係非酒店類嘅物業都唔少，若然而家放售都好值錢，如果佢哋肯賣嚟派息，咁就相當吸引。早前有新加坡投資者就不斷增持，市場可能憧憬佢買到咁上下就提出賣產分錢嘅要求，所以股價就搶咗上去。
如果茶友嘅講法係啱，咁就要睇大酒店董事局點反應，嚴格嚟講若然佢哋拒絕要求，其他股東都無辦法。不過，如果覺得而家啲嘢價錢去到咁高，賣啲嘢分吓錢無壞，咁就皆大歡喜，所以街外股東跟住炒，唔多唔少係要睇住大股東面色做人。信和酒店收報3.85元，升咗10%；大酒店收報15.96元，升咗9.6%，兩隻股都係高位稍為回落，反映都有啲股東趁好價食吓胡。
陸羽仁
金融High Tea 舊文
來源 source: http://hdfin.stheadline.com
