中環在線：曾淵滄喜見少人買財經書
■曾淵滄好少為書展出書。 資料圖片
一年一度書展開鑼，大家都話旅遊書大熱，睇嚟就算港股近期越升越有，又話大媽、北水掃貨，財經投資書都未必大有市場，難怪資深投資專欄作家曾淵滄都話少為書展出書，加上今年股市實在係好旺，佢忙住周圍講talk、講semin
ar教人投資，都冇乜時間寫書咁話。
每年書展都係香港人嘅大事，不過曾淵滄就有另一番見解。佢認為去書展嘅人多數係後生仔同埋媽媽級，佢哋都係好有目標咁買書，所以「財經書喺書展唔會發揮任何作用」，佢亦好少為書展出書，舊年市淡比較多時間，佢就一口氣出咗7本財經書，「寫掂就出」，今年忙住講股，冇乜時間，至今只係出咗兩本，上月先出咗本《股識》。
佢認為唔多人走去買財經書係好事，因為如果越來越多人買有關投資股票嘅書，即係反映股市開始熱㗎喇。
湯文亮教讀者適應辣招
至於近年寫專欄、寫書寫到冇停手嘅湯文亮就有新書推出嘞。湯文亮係紀惠集團行政總裁，2015年發表「細價樓爆煲論」而人氣急升，近年不停就樓市走勢同政府政策發表意見。最新佢有本《辣招如何扭曲樓市》，書中內容部份集結之前寫過嘅文章，部份係新近補充，佢話唔係批評辣招，只係叫市場點樣適應辣招。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
