笑到最後：三招睇何時離場
■每次大升市結束前，總有一隻新股炒到上天，2007年嗰隻係阿里巴巴。 資料圖片
港股連續15日之中升13日，大牛市重臨已經係共識。本欄肯定，大升市仍未完結，現時不過喺嗰50隻藍籌中揀10隻8隻強勢股，只要坐定便可，反而更重要係，幾時離場？
過去唔少大牛市，有
少部份人發大財，但係另一部份人輸到破產。第一類係高位買得最多，跌時唔肯走，短線投機變長線投資。第二類就係高位大跌後熊市反彈狂買，結果越買越跌。
大家可能會話，升市講呢啲，真係掃興。入市嘅第一個準則，就係諗定幾時走，今次牛市同北水，都被神化得太緊要，向前看，應該思考咩事會觸發大升市完結。
一，睇北水。淨係計滬深港通，北水每日成交約100億元，佔約一成。今年大部份時間都係處於淨流入，除咗3月1日同6月13日試過資金淨流出，滬深兩個港股通分別淨流出0.56億港元及4.18億港元，巧合嘅係，兩次淨流出後恒指都出現調整，3月時港股橫行兩星期，6月中港股最低調整到25200點。短線未必有必然關係，但如果之後出現成個星期嘅淨流出，要小心。
二，睇滬港通。一般相信，滬港通南下資金較大機會係險資等機構性投資者，買嚟長線投資，而深港通就係炒家，上海嚟嘅資金應該坐得比較穩，例如7月26日同27日連續兩日港股通（滬）淨流出，同上面一樣，如果上海錢係咁走，都可能係一種先兆。
三，每次大升市，總有一隻新股炒到上天，成為嗰次升市嘅最後一根稻草。2007年嗰隻叫阿里巴巴網絡（1688，已除牌）；2015年大牛市，Magnum（2080，現稱奧克思）可能係其中一隻。至於今次，高明覺得有兩間有可能係今次大牛市代表作：毛記葵湧同螞蟻金服。如果螞蟻金服上市，啟示會更大，上市後沽一半都唔過份。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
