中環在線：
Freestyle周凱旋孭Snoopy布袋
■日前揹住日系Snoopy布袋嘅周凱旋現身撐電競。
有錢人係咪一定穿金戴銀，勁貴名牌擺曬上身呢？都唔一定嘅，好似「超人」李嘉誠嘅紅顏知己周凱旋，佢早前出席一個電競活動，一身深灰色套裝，唔係挽住愛馬仕或香奈兒，而係拎住一個藍色S
noopy布袋，幾有個人style！
700蚊港紙有找
華華唔係時裝迷，周圍八卦一輪，估計周凱旋呢個布袋，係日本品牌45R出品，應該係早兩年45R為紀念《花生漫畫》Snoopy誕生65周年而出嘅產品，根據網上資料，當年賣9,000日圓（未連稅），計埋消費稅再兌番港紙應該700蚊有找。
45R喺日本有近40年歷史，品牌一向講求手工同質量，香港都有專門店。至於周凱旋係咪鍾意Snoopy，佢身邊人就話冇聽聞過，亦唔見佢成日拎住有Snoopy嘅物品。
其實今時今日都唔興成身名牌，Mix& Match襯出個人風格，感覺有品味有型格才是正路。周凱旋當日係參加年輕人喜歡嘅電競活動，拎個kawaii布袋都合理嘅。
作為超人嘅紅顏知己，56歲嘅周凱旋一向打扮低調簡約，通常黑色、灰色套裝，最特別就係一對貝殼耳環，差不多每次現身，佢都會戴住一對貝殼耳環。佢曾經講過，擁有第一對貝殼耳環已經係30年前嘅事，不過亦一早唔見咗。傳聞佢之後搵設計師整咗一批貝殼耳環，畀佢周一至周五輪流戴。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
