【大茶飯】和電特別息遲早落袋（青冰）
長和系近年的確動作多多，相信唔多唔少都係同接班有關，早在十年八載前，管理層不止一次話長和系股價被低估，無法反映真實價值，但要等到2015年先做野，誠哥啟動世紀重組，將長實及和黃合拼為長和(0001)，再分拆長實地產(1113)上市，當時市場話誠哥看淡本
港地產市場，所以在重組中變相減了持股。同年9月，長江基建(1038)宣佈和電能(0006)合併，雖然加咗一次價，但最終都被股東反對，失敗告終，當日澤鉅嬲嬲豬個樣，仍然深刻。
本來合併，就係貪電能啲現金，有助長建出外收購，由於長建只係持有電能39%，合併係對澤鉅最化算，而小股東得益最少。至今年初，電能忽然轉軚益股東，派5蚊特別息，早幾星期又再宣佈派7.50特別息，兩次加埋已經派咗263億。而長建今年已有幾個大型收購，都係同系內公司合作，年初買澳洲能源公司DUET，上星期就話買德國能源管理服務供應商Ista，兩單野加埋逾800億港元。照咁睇，未來的長建在澤鉅王朝肯定是非常重要，亦會繼續沿用合作的方式作收購，待日後羽翼已豐，多會收歸該等資產回旗下。
由於長和系近年豪爽，所以當傳出和電(0215)要賣固網業務，市場即刻喪炒，一個月內急升三成，原因都係博和電之後會派特別息囉。好喇，單刁昨天終於落實，作價145億港元，比之前傳的價錢仲要高兩成，正當小股東想開香檳之際，通告冇提及派息喎，仲講咗句「繼續對流動通訊業務進行投資」，個心即刻離一離，唔係嘛，又出去買野？
不過又唔使驚住，145億現金，折合每股大概3蚊，而現有流動通訊又唔係咩蝕大錢嘅野，相信單刁完成之後，點都會派啲嘅，唔好忘記長和現時持有和電66%股權，如果和電派一蚊，長和已經袋32億架喇，電能要幫長建，益小股東都在所不計，所以和電啲息，都係遲早落袋，股東們，定啲嚟。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
