中環在線 - 李華華 2017年11月28日
中環在線：
歐亞平同神秘囝囝拍住上
■網上唔難搵到歐亞平（左）同Hugo Ou合照，應該就係歐晉羿。
今年新股熱潮由眾安保險帶起，原因係馬雲、馬化騰、馬明哲「三馬」有份成立，不過查實大股東兼幕後打骰嘅，可能係人脈深厚嘅歐亞平，噚日佢仲將囝囝歐晉羿（Hugo）由非執董變成執董，實行兩父子打天下。
介紹番，眾安保險雖然有三馬持股，但其實大股東係身家已過百億元、內地著名富豪聯絡人歐亞平，亦都係眾安保險嘅主席，而眾安上市之前，佢就委任咗25歲嘅囝囝Hugo成為非執董。
不過，Hugo噚日起轉為執董角色，即係要落手落腳做生意，而唔係淨係喺董事會提供意見，翻查資料，眾安除咗佢老竇同埋行政總裁陳勁之外，佢就係第3個執董。
Hugo係富二代筍盤，讀緊書嘅時候已經喺爸爸間公司百仕達做企劃發展部經理，一做就做咗5年；2015年喺美國名牌大學普林斯頓拎到東亞研究學士學位後，就去咗一間叫Thrive Capital嘅公司搞投資，仲做埋百仕達非執董，佢亦都係一間北京網絡科技公司「有我在」嘅董事。
Hugo暫時未喺媒體曝過光，但由於佢英文名叫Hugo Ou，個姓比較特別，喺facebook真係好容易搵到佢嘅蹤影，不過相信佢擔任執董之後，好快就要直接面對傳媒喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
