金融High Tea 2017年11月28日
跟北水炒要夠膽汁
2017年11月28日
港股三萬點關口唔係咁易企穩，雖然港股美國預託證券上周五高收，但到香港開市，又繼續受A股拖住後腿。
內地股民年尾觀望氣氛好似突然瀰漫，令到港股短期唔係咁易突破。北水炒作大上大落，有時就算係回調，個股震倉都唔係咁易頂，本地股民要跟風炒，要小心頂佢唔順。
A股唔開胃港股都食滯
A股呢排處於股民收割期，大市不斷有獲利回吐盤，上周連日回吐後，滬深兩市昨日集體低開，午後芯片、半導體、5G等前期強勢題材股，以及大消費等白馬股全線暴跌，中興通訊(000063)、比亞迪(002594)等股跌停，搞到港股本來高開後都要跟跌。上證指數收報3322點，再跌咗31點或0.9%，芯片、半導體、5G等板塊跌幅居前。
內地股市呢排氣氛有啲淡，基本理由係好多投資者覺得經過今年回升後，來年好難憧憬大市有乜好勁嘅增長勢頭。
呢排其中一類跌得多嘅係「白馬股」，即係香港所講嘅績優股，內地股民柴台沽貨的理由好簡單，就係好嘢都公佈咗啦，咁預示明年內地經濟唔見得會有好勁增長，呢啲已經炒上咗嘅股票，仲有乜聯想空間呢？
於是大家齊齊沽貨食胡，令到個市跌咗落嚟。內地股市要消化，港股急升後就難免覺得都幾滯。
好似白馬股被人柴台，從基本面話佢哋好難再有增長，其實有啲勉強，實際我懷疑內地開始預備埋數，再加上美國十二月份可能加息心理影響，資金開始緊張有關。呢排內地資金緊張，搞到本地拆息都抽升埋。
無資金炒作，咁個市就算基本因素好都有無用，所以呢排如果內地繼續錢緊，港股都唔係咁易大力炒上。
大摩出口術吹跌芯片股
A股對港股嘅影響，最明顯有兩樣，一係內地A股拖跌埋H股，好似中興通訊(763) 收跌逾9%、比亞迪(1211) 跌3.5%、保利協鑫(3800) 插咗11%。
另外，早排內地炒芯片股炒個不亦樂乎，但係大摩就出招唱淡大型芯片股。台積電、西部資料、群聯電子等芯片行業巨頭，評級均遭下調。
大摩認為，目前快閃記憶體行業公司高企的股價已難再支撐進一步上漲，建議立即開始拋售持倉高位沽貨，並預計整個行業在短期內迎來一輪大幅回檔。
中芯(981) 昨日又跌4%，收報11.42元。簡單嚟講，就係內地熱炒的股票，呢輪都因為A股回調而洩咗氣，個市衝破三萬可以話升也北水、跌也北水。
北水炒起上嚟其實可以好癲，之前美圖(1357) 大力爆上，跟住下插，其他例子好似呢排隻比亞迪一個月由50元爆上80元，搭咗佢順風車就真係好爽，而且唔知佢幾時停車。
不過佢拋番落嚟嘅幅度都可以好快，幾日間就插穿70元。中港股市依家睇仲未破壞慢牛走勢，但如果自問唔係咁跟夠，咁跟炒前就要諗真啲。
強勢股退潮下，恒指收報29686，跌咗180點；國企指數跌135點，報收11772，成交1026億元。重磅藍籌股周一幾乎全線走弱，之前無乜升嘅滙控(005) 逆市升0.7%，收報76.8元，貢獻恒指19點升幅。
仲有就係濠賭股逆市造好，下月初公佈11月澳門賭收數據，市場提早炒作，澳博(880) 收升3%報6.28元；永利澳門(1128) 收升2.4%報23.3元；銀娛(027) 上揚0.9%收報58.6元。
陸羽仁
金融High Tea 舊文
來源 source: http://hdfin.stheadline.com
