智取大市：
風險回報的平衡
■港股短期命運繫於A股之上。 資料圖片
近期北水同埋A股表現，幾乎成為市場唯一波動因素。大陸意圖整頓理財產品，令資金鏈突然縮一縮，懷疑咁樣令到內地A股調整。茅台七連跌，中興通訊同比亞迪A股跌停板，相信後兩者已經跌散咗，但唔少金融A股同大價股，調整期間連續
一至兩日陰陽燭錄得鎚頭，證明唔少大價股未跌散，氣氛仍有機會快速回穩。港股短期命運繫於A股之上，好就好在，領袖股騰訊（700）四連陰但跌勢輕微，似乎爆升後仍有承接力。
一個唔知有幾深嘅調整，正好測試所有好友嘅承壓能力。近期散戶買股嘅進取程度，以騰訊為例，大概分為幾種，第一，只持有騰訊正股；第二，一邊持有騰訊正股，然後視乎情況再加騰訊Call輪、牛證；第三，純買騰訊Call輪、牛證博大霧；第四，一股騰訊都冇。
如果只持有騰訊衍生工具嘅人，可能本太少，又有可能覺得買正股升幅太少，唔夠喉，加上之前連升之勢，容易令人相信騰訊只會一條氣急升，頭也不回，所以買call輪、牛證博到盡。不過，即使有信心終點能夠去到更遠，但只要錯估中間過程，唔少散戶頂唔住幾日調整就要投降。一方面係錯估自己承受風險能力，另一方面冇為短期市況諗多幾個唔同scenario，只要走勢略為偏離自己預想，就會大失預算。
世上並無最完美嘅追揸沽策略，一切在乎自己風險承擔能力，加上對於回報有幾大野心，唔好講話測市、揀股要有智慧，剩係喺風險同回報之間取得平衡，就已經係窮盡一生都喺度學習嘅大學問。
晉佳FB https://www.facebook.com/advanceguy1/
晉佳
智取大市 - 晉佳 舊文
來源 source: http://hk.finance.appledaily.com
