金手指：英國樓現在不能買
■倫敦公屋Grenfell Tower嘅一場大火，令好多管理公司要調升管理費。 資料圖片
睇題，大家一定估孫柏文講緊脫歐、英鎊走勢、人口變遷等等。如果你咁諗，就錯曬。
今年年中，倫敦有棟公屋叫Grenfell Tower發生咗一場大火，燒死80人。出事原因
，係貼喺兼包圍外牆嘅保溫物料原來超易燃，當四樓一個單位嘅電器著火時，全棟大廈被焚毀。之後，英國政府推出一系列措施。首先，英國政府即刻急急腳驗七種之前話「達標」嘅保溫物料，發現六隻肥佬。咁公屋、私樓，原來好多都有用。
亦因呢個情況，其中一個新措施，就係硬性要求每棟有用肥佬物料嘅高層大廈，要每日廿四小時，請啲人行行企企，睇實棟大廈有冇著火。原本冇人看守嘅大堂，忽然有個著螢光衣嘅人喺到，出緊平均100蚊港紙粒鐘嘅糧。而走火政策，亦又「Stay Put留喺到」變成「Simultaneous Evacuation合家即走」。
因政策只推出一兩個月，好多管理公司未趕得切調升管理費。不過睇上周第一浪嘅加幅，一加就倍加。仲有，業主最後仲要幫外牆換物料。唔好話使費大力打擊租金回報，一旦冇換，你放租，遇火警，淨係場火燒爛租客啲嘢，你都可被告。
喺英國得三層嘅樓或屋，可以諗。不過多層一定要喺情況明朗前避之則吉。有貨，建議即沽。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
