笑到最後：炒股票的樽頸
■港股係開放市場，投資同一時間會同全世界唔同嘅高手對戰。 資料圖片
上星期做節目，有觀眾話自己炒到上十萬蚊出現樽頸，點樣先可以突破樽頸，炒上100萬？
股票市場有冇樽頸，一方面可以話有，另一方面可以話冇。冇嗰方面係，港股係開放市場，同一時間會同全世界唔同嘅高
手對戰，大家每日都不斷進步，可能你都進步緊，但人哋進步得快啲，咁就會落後其他人。再加上，即使自已覺得10萬係樽頸，其實相同問題去到100萬、1,000萬都會重覆出現，注碼大咗，可以分配嘅靈活性提高，亦都較易賺絕對回報，但增長率可能未必及本細時高。
至於覺得有樽頸，最大可能係個人問題。以高明為例，最近都遇上一個攤凍嚟食嘅問題，具體例子至少有兩個。
第一次係10月尾，恒指大約喺28100點徘徊，當時高明喺電台反覆叫人買一注收回價28000點嘅牛證，因為覺得28000點唔會穿之餘，隨後都會炒上三萬點。結果等約半個月，好快先破兩萬九後上三萬點，當中高明亦有換更貼價牛證以博更高回報，高𥧌期回報達四倍，亦都有喺三萬點樓上食一半糊。不過11月28日出現「假奇蹟日」，當日以為係真，一窩蜂衝返入去。結果？過兩日裂口低開即刻打曬靶，成單交易七除八扣微輸，保住本金，但回報亦如浮雲。
最近一次，再次回落至兩萬八，高明再睇會重上三萬點，今次醒咗，喺電台叫人一路升一路調高止賺防守線，星期五跌穿29000即時走，今次計返有賺，但由暴利變微利。
至於算唔算樽頸，都答你唔到，因為高位可以任食，卻選擇攤凍嚟食，完全係受市場氣氛影響之下嘅決定，到回落後觸及止賺位保本離場。唔貪心就唔會有耐性等升過千點，但貪心嘅另一面就係去到高位更貪，稍有回落便令暴利化為烏有。正值年尾，係時候埋單計計數，檢視今年有冇做錯手勢，用紙筆寫低佢，出年一定唔可以再犯。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
