操盤手劄記：股壇最紅的醫生
■林順潮開辦嘅希瑪眼科招股上市，令佢呢期好紅。資料圖片
新年伊始，環球股市就鬥破頂。美國寒流肆虐，美股卻熱火朝天，道指上周四突破25000關，美國總統特朗普隨即喺Twitter話睇30000，當然不忘歸功自己。特朗普牙斬斬，其實唔多盞。美國記者出書爆白宮
內幕，兼質疑佢精神狀態唔啱做總統，佢即刻撻著，話自己係穩定嘅天才！
佢係咪精神健全，要問醫生；但係咪成功商人，就唔使問，睇佢重啟登月計劃，而非急於去火星就知。重返月球嘅實際利益比去火星高，月球蘊含大量氦三，極具商業價值！特朗普牛市，令佢成為美股紅人；咁港股呢？呢期最紅係醫生！唔係曹貴子，係林順潮！
林醫生開辦嘅希瑪眼科（3309）招股上市，引入騰訊（700）主席馬化騰、思捷（330）創辦人邢李㷧等作基石投資者，名人效應下，超額認購超過1,500倍。希瑪已截飛，市場估計首日掛牌有望升四、五成。新股賭彩數，有糊要即食，不妨轉吼有分拆概念嘅股份。
港股已連升10日，距10年前歷史高位31958只差一千點鬆啲。今昔比對，恒指現今市盈率、市賬率分別為14.3倍同1.4倍，比當年嘅16.7倍同2.7倍低；營收、盈餘就比當年多78%同28%，反映估值同盈利能力都比當年好。以往中資股表現較落後，隨著A股年中入摩，則可睇高一線。
市場最睇好指數重磅股如金融股，德銀首選嘅20隻中資股，當中4隻係金融股，分別係平保（2318）、中行（3988）、農行（1288）同中信証券（6030）；瑞銀都首選平保；高盛、瑞信亦相中平保，四者都睇該股今年晉身紅底股。事實上，平保大把金蛋可分拆，值得憧憬。
平保旗下有11家互聯網科技公司，包括陸金所、平安好醫生等。當中，陸金所最快月底申請在港上市。呢期醫療股當旺，平安好醫生亦可能食住上。受中保監規範險資股權投資影響，內險股受壓，平保現價82.25元，略跌穿10天線，20天線則上移。有分拆跟尾，可分注收集。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com
