金手指：Put輪真係好抵買
■港股近歷史新高，息口加緊，全球央行收水，呢啲環境，應減持多過增持。 資料圖片
每個交易日，收市後不久，孫柏文個電話就會震一震。因個股票報價app有啲短訊式市況總結。呢期，基本上日日都收到話「某某板塊受國內資金追捧，升XX%」。不過，當我記低邊日升啲乜後，過
幾日再check，就發現絕大多數都落番落來。
牛市資金輪流炒，每日升嘅嘢唔同，更重要係冇份升或升過一日嘅股票會企得硬。香港人就算入染缸幾耐，到最後都仲信價值投資。就算純炒，都唔該唔好太hea咁吹嚇啲基本因素呀。如果係真·基本因素，就唔會今日升一成，聽日撻番落來。
當啲大陸盲牛資金亂衝，即啲鈔票係咁印。不過人民幣就係咁升，因第一美元好弱，第二係當連喺海外撳ATM都要限，啲外匯管制實在好辣。唧咗啲錢去咗啲合法裂口，例如港股通。不過連日本央行，都開始加入收水行列，唔知呢啲全球嘅盲牛力可以維持幾耐。港股近歷史新高，息口加緊，全球央行收水，呢啲環境，真係應減持多過增持。
最後，全球特別係美國嘅股市恐慌VIX指數，破歷史新低。咁呢個指數測慌方法，只係睇嚇啲賭跌Put輪賣幾貴。即係啲Put輪好平。之前我話過長Put，呢幾日都有加注，啲Put輪真係好抵買。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
