Can Bank：
碧桂園會成為另一個奇葩？
■碧桂園晉身藍籌後一個月，股價升20.4%，比吉利更奇葩。 資料圖片
踏入2018年，港股延續去年底的升浪，連續上升十個交易日，藍籌股中內房股升完又升，新晉藍籌碧桂園（2007）在今年五個交易日已經升一成七，可謂繼吉利（175）之後
，另一個奇葩（當然唔計騰訊，700）。
以染藍後股價表現去睇，碧桂園比吉利更奇葩，碧桂園晉身藍籌後一個月，股價升20.4%，而吉利只升6.7%，以呢個角度睇，碧桂園比吉利更奇葩，吉利由去年3月6日染藍後，至今日未夠一年，股價升幅達到1.6倍，碧桂園一個月已升兩成個勢，股價可以走到幾遠？
有跟縱內房股的讀者，大約都知今次升勢唔多唔少係同內地個別城市放寬調控有關，在剛過去嘅周末，蘭州、南京以及合肥開始實行「一城多策」嘅調控政策，其中蘭州核心區買樓仍要三年先可以賣出去，但部份區域取消限購，而南京亦公佈「創新10條」內容大概係針對唔同嘅人，有唔同嘅落戶政策。市場對這些消息理解為調控放寬了，加上碧桂園買樓又交到成績，令股價染藍到今日已經升到三成半。
不過，樓市撇除本身是周期性行業之外，內地樓市更是一項民生工程，所謂的宏觀調控由近十年前，投資者以為是冷卻樓市的暫時性政策，到今日調控已變成必然嘅遊戲規則。
雖然樓同車某個程度上市場都有很大需求，但講到必要性，樓比車更必要，亦都係因為咁，中央對樓市睇得更緊，調控起上嚟……大家唔使諗，用眼睇都睇到，更重要嘅係，發展商係用負債去拓展業務，呢個亦解釋到點解內房衰起上嚟，真係可以貼曬地。講到尾，咁即係點？調控有鬆有緊，個勢係好嘅咪衝囉，長揸真係要諗過。
散子
Can Bank - 散子 舊文
來源 source: http://hk.finance.appledaily.com
