財路：哈電殘到冇陰功
■哈電技術同研發競爭力十足，透過海外市場，尤其一帶一路帶嚟肥仔商機，哈電有運行。 互聯網圖片
哈爾濱電氣（1133）現價比每股淨現金同計劃配內資股股價大潛水，PB得0.28倍，殘到冇陰功。
哈電到今年6月尾揸現金150億元人仔，扣減長短期借款後，淨現金講緊高達90.8
億元人仔，折約107億港元，或每股7.76元，哈電現價3.49元，比每股淨現金大折讓55%。
哈電上年計劃向阿媽哈電集團配發內資股，配售價4.56元或最高4.79元，哈電現價潛水近23%至27%。哈電連製作順風順水，淨現金將會高達106億元，每股近7.7元，哈電超級現金牛！
哈電呢次配發內資股，H股冇多到，keep喺6.75億股，H股市值得23.6億元，喺同級電氣設備商當中，哈電細奀茄。
哈電現價潛近八年底，PB得0.28倍，比上市以嚟平均0.89倍PB，大折讓近70%，哈電亦係殘到爆。
又咪睇哈電老牌國企，呢期由哈電本身研製、全球單機容量最大白鶴灘100萬千瓦水電機組，已經獲驗收，呢個技術領域進入咗無人區。
據集團網站報道，哈電旗下鍋爐公司研發燃煤耦合垃圾發電技術，可以將發電率提高到31.6%，兼解決垃圾發電排煙溫度高、飛灰同二噁英等環保問題。
睇到係，哈電技術同研發競爭力十足，內地電氣製造過緊冬天，哈電透過海外市場，尤其一帶一路帶嚟肥仔商機，哈電仍然有運行。
市場搵嘢炒，理由兼此一時彼一時，繼炒量寬，連加息都話有得炒，分分鐘舊經濟股又抬頭。
買哈電，當上到內資股計劃最高配售價4.79元，哈電講講要升43%，目標價比每股淨現金值折讓38%，到時PB0.4倍，亦未有耐追到歷史平均值。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com
