加價股份有運行
2018年01月09日
港股再升，開展近五年最長升浪，有啲板塊借住好消息炒，當中包括有三、四線城市「減辣」的內房股，同埋陸續公佈加價的紙品股。
啤酒紙品股先展升浪
內地經濟去年表現勝過預期，新年頭個別商品宣佈加價，呢個可稱之為內地版再膨脹。
之前內地大啤酒廠
上調價格，推升啤酒股表現。呢兩日，輪到紙廠宣佈加價。去年內地加強廢紙管理，令到回收廢紙價上升，不利呢類股份表現。不過，內地網購仍然處於增長期，紙品商可以轉嫁成本。由於紙廠投資龐大，加上內地去產能，在供應受控下，產品喺新年前後開始加價，所以紙品股開始當炒。玖龍紙業(2689) 、理文造紙(2314) 上升超過6%，晨鳴紙業(1812) 升5%。
睇番紙業股走勢，去年頭三季佢哋都表現強勢，踏入第四季開始調整，主要係內地廢紙價上升，擔心成本增加影響公司盈利。長遠而言，分析家擔心紙價向好，會鼓勵新產能投入，令到呢個板塊由高位調整，好似玖龍紙業就由高位17.42元調番落去12元邊，回落幅度都幾大。
市場擔心紙品股的兩大負面因素，前者係近憂，後者係遠慮。以成本上升的近憂睇，似乎紙廠逐步消化，慢慢將成本轉嫁畀用家。玖龍管理層就透露，喺12月份已加價3次，每噸紙共加價300至600元人民幣，同時看好明年紙價走勢，未來會視乎成本去考慮是否上調價格。
去年集團3台新紙機於8、9月份已陸續投產，預計明年總產能會較今年產能有所增加。照咁睇，大紙廠有能力去轉嫁，至於產能增加呢啲就係中長線憂慮，由於紙品股即將公佈業績相對靚仔，股價又調整咗落嚟，喺市好資金搵嘢買之下，對好消息就有反應。
由於加價消息可能未完，估計首季呢個板塊，都有機會成為炒業績受惠者。
另一個炒好消息的板塊係內房股，陸羽仁啱啱評點完去年的賣樓英雄榜，喺榜上前列公司幾乎全線造好，藍籌股碧桂園(2007) 表現突出，收升7.4%報17.42元，為表現最佳藍籌股，貢獻恒指28點；中海外(688) 收市升逾5%報29.4元，為連升12個交易日，推高恒指18點；雅居樂(3383) 更大升11%收報14.4元。
股市牛氣旺，大行樂意再送一程，高盛最新發表報告，上調MSCI亞太指數年底目標1.6%至630點。去年MSCI亞太指數升幅達三成四，高盛根據過去經驗，在八個指數回報超過兩成半的年份，有五次在其後一年錄得正回報，其時盈利增長一般理想，估值亦算貴，與今次情況一樣。
該行現時最看好中國、印度和南韓市場，估計MSCI中國指數12個月回報達14%，至於MSCI香港指數回報則達8%。
市旺港交所又新高
大行睇好中國股市，內地股市喺去年底調整後，新年走勢唔弱，滬指持續上漲，昨日破咗3400點大關，上證指數收報3409點，升17點；深證成指收報11382點，升39點業，內房A股表現唔差，萬科A(002) 早盤拉升逾4%，市值突破4000億元重返深市老大寶座。恒指早起步過A股，獲利回吐壓力大啲，周一高開曾漲114點，其後就曾倒跌82點；午後才重拾升勢，恒指收報30899，升84點；國企指數收報12235，上揚23點，成交有成1337。港股連升10個交易日，創出逾5年來最長升浪，期內累漲1665點。市場對股市情緒樂觀，港交所以全日高位收市，收升3.5%報262元，股價創逾兩年新高。
陸羽仁
金融High Tea 舊文
來源 source: http://hdfin.stheadline.com
