大棋局：人民幣進退兩難
■人民幣現階段不可能出現大升勢，否則等於鼓勵人高位賣資產換美元走，若貶太急亦易引來擔憂。 資料圖片
人民幣兌美元再度升穿6.5，中國外匯儲備亦連升11個月，站穩3萬億美元以上，引來市場揣測，人民幣係咪重拾升勢？要唔要買定人民幣責袋？
人民幣其
實比其他外匯較易睇，主要原因在其有嚴格管控，有人為管控就代表有路捉。
中國M2每年以12至14%增長，中國GDP每年約增長6%。用一個不精確講法，即係每印2蚊銀紙，先有1蚊經濟增長，咁樣嘅做法，你認為可唔可以持續？當一隻貨幣只在國內玩，濫印銀紙也只會在國內爆煲，情況如津巴布韋。但當一隻貨幣成為全世界主流貨幣後，爆煲就係全球70億人一齊分攤埋單，此其一。如果全球央行重貨揸住津巴布韋幣，冇一個國家會希望穆加貝倒台，此其二。以上兩點係事情之本質，決定咗人民幣最終必定要搶灘國際化。
但人民幣要國際化，最終將受到三元悖論限制，即資本自由進出、固定匯率、獨立自主貨幣政策，三者只能擇其二。獨立自主貨幣政策中國一定死揸，所以最後係資本自由進出及固定匯率二者擇其一。
匯價波動不會太大
自1994年人民幣匯改後，中國外匯儲備以幾何級數上升，因此後期人民幣之貨幣政策，實際上和外匯儲備掛鈎。也就係大約每收1蚊美元返嚟，印7蚊人民幣。市場已習慣此機制，如果中國外匯儲備急跌，市場就會認為人民幣唔值現時呢口價。此所以點解中國咁緊張，用各種手法限制外匯流失，保持3萬億美元關口以上。
於是又返去最初的問題，獨立自主貨幣政策死揸，資本又唔可以自由進出，匯率浮動又受限，咁人民幣點樣國際化？
因此可以判斷，中國現時各種貨幣政策，是在測試外匯儲備緩緩遞減情況下，市場上人民幣應該值乜嘢價。用最簡單講法，外匯儲備唔見1萬億美元，人民幣兌美元6.5你受唔受？中國外匯儲備最終必然會減少，不單是經濟問題，而係SDR五大貨幣之中，只有人民幣係集中以他國貨幣作為自己嘅發行基礎。中國要躋身大國地位，自己嘅貨幣無可能要睇人眉頭眼額。
當美元回流大勢形成，人民幣盯住美元就會受到衝擊。所以現階段人民幣不可能出現大升勢，若升太急等於鼓勵人高位賣資產換美元走，若貶太急亦易引來擔憂。中國1月推石油期貨，6月A股入MSCI，仍處於引人習慣用人民幣階段，波動不會太大。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
