魚樂無窮 - 唐牛 2018年12月11日
魚樂無窮：觸動樓價之關鍵 - 唐牛
樓價升跌心理因素大於一切，最能觸動香港人心情的，還是股票市場。 資料圖片 適中字型 較大字型
特首林鄭月娥出席公開場合時表明，樓價調整剛開始，未能抵銷今年升幅，更遑論她上任以來的升幅，所以叫心存樓市快將減辣幻想的人士可以慳番。事實上，政府一旦減輕樓市辣招稅項，市場供應必然大幅增加，實際上是會推低樓價而非托價，相信她亦非常清楚，叫大家慳番絕對出自真心。是故她直言樓市下跌是好事，潛台詞係唔使政府做元凶，變相孭少一隻鑊。
樓價跌勢何時中止，我冇水晶球，當然唔會知道，但之前已提過，樓價升跌心理因素大於一切，即當市場一窩蜂睇淡樓價，沽貨的人只會越來越多，但買家卻會隨之減少，形成惡性循環，結果造成近日的劈價潮，越劈越起勁。
甚麼因素令悲觀指數直線上升？加息只是其中一個因素，但最能觸動香港人心情的，還是股票市場。恒指今年初創新高後一直回落，有反彈冇升幅，已經傷透唔少股民心，中美貿易戰打極都未完，仲要鑊鑊新奇鑊鑊甘，唔少人開始驚香港經濟遲早被拖垮，從而推冧樓價，實力稍差的有樓之士，只能沽貨離場，部份換樓客亦為免要硬畀稅，焗住劈價出貨。講到呢度，一直等緊上車的戰友，應該知道參考甚麼指標啦？
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com
