大棋局 - Mr. Tregunter 2018年12月11日
大棋局：美國的落刀時機 - Mr. Tregunter
中國現下係山寨大國，但在美國角度，山寨到咁上下，慢慢會有自己一套，所以美國要在轉型之前落刀。
資料圖片 適中字型 較大字型
5G的特點係波長較短，頻寬較闊，所以速度可以更快。速度快有乜咁重要？例如無人駕駛汽車對穿黑衣服的人反應較慢，其中一個解決方法係提升數據傳送速度。
未來的世界，可能係一個物聯網世界，即物件與物件之間都會透過網絡傳輸數據互動。
試想像一下你揸車返屋企，預計30分鐘後到，拎部手機出嚟遙控焗爐預熱，再設定10分鐘後自動開埋冷氣，一返去就整隻燒雞嘆。點知塞車，此時架車就會根據你所在位置預計你到步時間，通知屋企部焗爐、冷氣遲啲再開。到你入屋喺雪櫃拎罐啤酒，雪櫃通知你最後一罐要唔要訂，你㩒OK，雪櫃將資料傳落手機APP幫你訂。
上述情境如果再進一步，就係AI醒水自動處理，機械人招呼埋你。以上種種都牽涉一樣嘢：數據傳送。
第一部平板電腦1989年已出現，但硬件、軟件、網絡唔配合，冇人用，直到2000年後先再興起。要發展至上述情境，網絡的發展至關重要。因此，掌握每一代網絡標準之專利，就同揸住廣東道地舖一樣，淨係收租都唔使憂。
趁山寨大國未轉型
過去2G到4G時代，核心通訊技術主要畀高通、愛立信等企業揸住。不同的設備，甚至每一部手機都要交專利費畀相關企業，例如高通已公佈每部5G手機要抽2.275%至3.25%批發價。
5G預計2019年開始商用，2020年正式應用。現時華為要爭的就係同5G相關的各種技術專利，即係話，要由過去的租客，躋身為其中一個收租佬。
華為申請專利雖多，核心技術卻少，因此仍然只屬起步階段，先在芸芸老叔父之間插支旗。若無法插旗，交專利費都交到傻，屆時手機無法平過人，市場佔有率就會收縮。
要鬥核心技術，中國無得鬥，但中國在戰略操作上步步進逼。例如5G通信分為控制信道同數據信道，前者主要傳輸指令，後者主要傳輸數據。中國冇研究出一套國際編碼，華為就運用土耳其教授的極化碼（Polar）並再研究發展，贏得投票，成為5G控制信道國際編碼標準，高通的LDPC則成為5G數據信道國際編碼標準，與美國分庭抗禮。
任何事一開始一定係抄，畫畫、書法開始都靠臨摹，到咁上下自己創出一套。中國現下當然係山寨大國，但在美國角度，山寨到咁上下，慢慢會有自己一套。等你有自己一套時先鬱手可能就遲，要落刀，就在你轉型之前。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
