金融High Tea - 陸羽仁 2018年12月21日
炒美聯博有大蚺蛇
2018年12月21日
聯儲局開會後加息四分一厘，同時將來年預計加息次數，由三次減到兩次。雖然利率調升幅度比之前慢，但主席鮑威爾轉軚唔係咁明顯，會後聲明繼續針對特朗普打開口牌作回應，揚言政治不能影響聯儲局決定。杜指由原先升逾300點，一度急插超過500點，收市都跌352點。
儲局扭擰難掃陰影
中環茶友講起點睇儲局聲明，普遍認為鮑威爾雖然話不受政治影響，但態度已經無10月時咁鷹，不過亦唔夠鴿。
外界可以話全球增長有放緩跡象，儲局減少明年一次加息估計，都回應經濟格局調整政策，好難話係受特朗普壓力。
外界呢個講法，或者係鮑威爾希望取得嘅效果，猶抱琵琶半遮面，既唔會太得罪總統，又唔會太冇面，畀人話喪失央行獨立性。
反正如果經濟繼續放緩，儲局都會押後加息，特朗普到時就會話自己做咗嘢。
美聯集團(1200) 集團主席黃建業趁呢個時間宣佈增持股份計劃，令股價升4.5%，收報1.63元。
雞肋方案被迫要回應
根據黃主席建議，佢會按每股2元，向合資格股東收購5744萬股股份，相當於公司已發行股份約8%，成功後佢同相關人士持股，會由27.1%增至35.1%。黃主席出價2元收購，美聯收報1.63元。有中環茶友過去見代理生意好，喺2元以上入貨，O依家見咁嘅情況應該點做？係咪應該入多啲貨？
先要講講昨日收市價1.63元，同收購價2元有咁大差距，原因係黃主席只增持8%，超額唔收，唔係全面收購，若然所有街外股東投降賣畀黃主席，咁你想賣9股畀他，他只係買1股，正因如此先會出現收購價同市價仍然有咁大折讓。
至於入唔入貨，之前陸羽仁一直潑茶友冷水，話新盤好賣唔代表地產代理股美聯買得過，皆因呢類盈利波動咁大嘅股份估值唔高，茶友唔信邪O依家坐咗艇。現時主要股東增持有無甩貨機會，主要唔係2元嘅增購建議，而係呢個方案會唔會引出想將公司成間吞落肚的大蚺蛇。
黃主席現時持股27.1%，即係話街外流通股份比佢多兩倍以上。
喺呢個情況下，過去都無人成功挑戰佢嘅控制權，現時樓市同外圍經濟唔明朗，咁點解佢唔等股價再低殘啲先郁手呢？答案有兩個可能，一係佢估計來年初中美可能達成協議，提出呢類方案要一段時間去做，所以無謂計到咁盡，O依家郁手先。
另一個可能性就係佢感覺到個市再落，股價再低，有可能吸引其他人挑戰佢嘅控制權，咁不如先下手為強增持。
黃主席拋出的方案有啲雞肋，客觀效果係黃主席成功就可以有35%股權，遠遠超過全面收購觸發點，其他人日後要挑戰佢嘅難度大增，所以若然有大戶要覬覦公司，就要作出回應，包括出價爭奪或者炒高散貨，否則日後就可能被綁要做順民。
按照呢個思維，若然現在入貨，目的就唔係接受黃主席嘅部份增持方案，而係博持有美聯主要股份的大蚺蛇出現搶食。
以昨日收市價計，假設有人爭購出價2.1元，咁現價仲有28%水位，以回落一成斬纜計，沽出價係1.46元，賠率有1賠2.8，似乎好過聖誕假去澳門買大細。
陸羽仁
金融High Tea 舊文
來源 source: http://hdfin.stheadline.com
